ബെംഗളൂരു: 2027 -ലെ സിവിൽ സർവ്വീസസ് പരീക്ഷക്കു തയ്യാറെടുക്കുന്നവർക്കുള്ള സമഗ്രപരിശീലനം കേരള സമാജം ഐ.എ.എസ് അക്കാദമിയിൽ ഫെബ്രുവരി 22-ന് ആരംഭിക്കും. പ്രിലിമിനറി, മെയിൻ പരീക്ഷകൾക്കായി പതിനെട്ടു മാസത്തെ പരിശീലനമാണ് നൽകുന്നത്.
ആദ്യത്തെ രണ്ടു മാസം പരിശീലനം പൂർണ്ണമായും സൗജന്യമായിരിക്കും. മത്സരാർത്ഥികളുടെ അഭിരുചി വികസിപ്പിക്കാനാകും ഈ ഘട്ടത്തിൽ ഊന്നൽ നൽകുക. അതിനു ശേഷം താത്പര്യമുള്ളവർക്ക് 16 മാസത്തെ പരിശീലനം നൽകും.
ഇന്ദിരാ നഗറിലുള്ള കൈരളീനികേതൻ എഡ്യൂക്കേഷൻ ട്രസ്റ്റിലാണ് പരിശീലനം. കസ്റ്റംസ് ആൻ്റ് ഇൻഡയറക്ട് ടാക്സസ് കമ്മീഷണർ പി. ഗോപകുമാർ മുഖ്യ ഉപദേഷ്ടാവായ, സിവിൽ സർവ്വീസ് ഉദ്യോഗസ്ഥരും പരിശീലന രംഗത്തെ പ്രഗത്ഭരും അടങ്ങുന്ന സമിതിയാണ് പരിശീലനം നൽകുന്നത്. വൈ സത്യനാരായണ, ശോഭൻ ജോർജ് എബ്രഹാം, ഡോ: മോഹൻ കൃഷ്ണമൂർത്തി, അബ്ദുൾ റസാക്ക്, ജി.രമേഷ്, സത്യ വന്ദേമാതരം, നവനീത് കുമാർ, നിഖിൽ ശ്രീകുമാർ, ദേവപ്രസാദ് തുടങ്ങിയവരാണ് പരിശീലകർ.
2011-ൽ ആരംഭിച്ച അക്കാദമിയിൽ നിന്ന് ഇതുവരെ 161 പേർ ഐ.എ.എസ്, ഐ.പി.എസ്, ഐ. ആർ.എസ് തുടങ്ങി വിവിധ സിവിൽ സർവീസുകളിലേക്ക് തെരഞ്ഞെടുക്കപ്പെട്ടിട്ടുണ്ട്.
പരിശീലനത്തിൽ പങ്കടുക്കാൻ താത്പര്യമുള്ളവർ വിശദ വിവരങ്ങൾക്കായി 8431414491 എന്ന നമ്പരിൽ ബന്ധപ്പെടണമെന്ന് ബാംഗ്ലൂർ കേരള സമാജം ജനറൽ സെക്രട്ടറി റജികുമാർ അറിയിച്ചു.
SUMMARY: Kerala Samajam IAS Academy: Training for 2027 exams to begin on February 22
