തിരുവനന്തപുരം: കത്ത് വിവാദത്തില് വ്യവസായി മുഹമ്മദ് ഷര്ഷാദിനെതിരേ നിയമനടപടിയുമായി സിപിഎം സംസ്ഥാന സെക്രട്ടറി എം.വി. ഗോവിന്ദന്. ഷര്ഷാദിന് വക്കീല് നോട്ടീസ് അയച്ചു. അപകീര്ത്തികരമായ പ്രതികരണങ്ങള് നടത്തിയതിനാണ് വക്കീല്നോട്ടീസ് അയച്ചിരിക്കുന്നത്.
അഡ്വ. രാജഗോപാല് നായര് മുഖേനയാണ് നോട്ടീസ് അയച്ചത്. ആരോപണങ്ങള് മൂന്നു ദിവസത്തിനുള്ളില് പിന്വലിക്കണം, ആരോപണം ഉന്നയിച്ച മാധ്യമങ്ങളിലൂടെ തന്നെ പിന്വലിച്ച് ഖേദപ്രകടനം നടത്തണം തുടങ്ങിയ കാര്യങ്ങളാണ് നോട്ടീസില് ആവശ്യപ്പെട്ടിട്ടുള്ളത്. അടിസ്ഥാനരഹിത ആക്ഷേപങ്ങള് ഉന്നയിച്ച് തന്നെ പൊതുജനമധ്യത്തില് അപകീര്ത്തിപ്പെടുത്താനും മാനഹാനിയുണ്ടാക്കാനും ശ്രമിച്ചുവെന്നും നോട്ടീസില് പറയുന്നു. കത്ത് ചോര്ന്നു എന്ന ആരോപണവും നിഷേധിക്കുന്ന വക്കീല് നോട്ടീസില് കത്ത് പൊതു മധ്യത്തിലുള്ളതാണെന്ന് വ്യക്തമാക്കിയിട്ടുണ്ട്.
രാജേഷ് കൃഷ്ണയ്ക്കെതിരെ ഷര്ഷാദ് പൊളിറ്റ് ബ്യൂറോയ്ക്കും കേന്ദ്ര കമ്മിറ്റിക്കും നല്കിയ കത്ത് വലിയ വിവാദങ്ങള്ക്ക് വഴിവെച്ചിരുന്നു. 2022ലായിരുന്നു ഷര്ഷാദ് രാജേഷ് കൃഷ്ണയ്ക്കെതിരെ പരാതി നല്കിയത്. ഈ കത്ത് ചോര്ന്നെന്നാണ് ആരോപണം. മധുര പാര്ട്ടി കോണ്ഗ്രസില് വിദേശ പ്രതിനിധിയായി രാജേഷ് കൃഷ്ണയെ ഉള്പ്പെടുത്തിയതിനെതിരെയും ഷര്ഷാദ് പരാതി നല്കിയിരുന്നു. ഷര്ഷാദ് സിപിഐഎം നേതൃത്വത്തിന് നല്കിയ കത്ത് കോടതിയില് ഒരു രേഖയായി വന്നതോടെയാണ് വിഷയം വീണ്ടും ചര്ച്ചയായത്. പ്രതിനിധി സ്ഥാനത്ത് നിന്ന് തന്നെ നീക്കിയത് വ്യാജ പരാതിയുടെ അടിസ്ഥാനത്തിലാണെന്ന് ചൂണ്ടിക്കാട്ടി രാജേഷ് ഡല്ഹി ഹൈക്കോടതിയില് സമര്പ്പിച്ച മാനനഷ്ടക്കേസിലായിരുന്നു പരാതി രേഖയായി സമര്പ്പിച്ചത്. പൊളിറ്റ് ബ്യൂറോയ്ക്കും കേന്ദ്ര കമ്മിറ്റിക്കും നല്കിയ പരാതി രാജേഷ് കൃഷ്ണയ്ക്ക് ചോര്ത്തി നല്കിയത് എം വി ഗോവിന്ദന്റെ മകന് ശ്യാംജിത്താണെന്ന ആരോപണവുമായി ഷര്ഷാദ് രംഗത്തെത്തിയിരുന്നു.
SUMMARY: Letter Controversy: Lawyer sent notice to MV Govindan against Sharshad who made the allegation.
