വിലയിലെ വർധന; മാമ്പഴ വിൽപനയിൽ ഇടിവ്

ബെംഗളൂരു: വിലയിൽ വൻ വർധന രേഖപ്പെടുത്തിയതോടെ മാമ്പഴ വിൽപനയിൽ ഇടിവ്. കർണാടകയിൽ ഉൽപ്പാദനം കുറഞ്ഞതോടെയാണ് മാമ്പഴങ്ങളുടെ വില വർധിപ്പിച്ചത്. സാധാരണ മാമ്പഴങ്ങൾക്ക് പോലും കിലോഗ്രാമിന് 150 രൂപയാണ് വില. സംസ്ഥാനത്ത് ഇത്തവണ 30 ശതമാനം മാത്രമാണ് മാമ്പഴം ഉത്പാദിപ്പിക്കാൻ കഴിഞ്ഞത്.

ആന്ധ്രാപ്രദേശ്, കേരളം, തമിഴ്‌നാട് എന്നിവിടങ്ങളിൽ നിന്ന് വരുന്ന മാമ്പഴത്തെയാണ് സംസ്ഥാനത്ത് നിന്നുള്ള മാമ്പഴ വിൽപ്പനക്കാർ ആശ്രയിക്കുന്നത്. മാമ്പഴത്തിന്റെ വൈവിധ്യവും വലുപ്പവും അനുസരിച്ച് കിലോയ്ക്ക് 160-200 രൂപ വരെയാണ് വില.

എന്നാൽ വില വർധിച്ചതോടെ മാമ്പഴത്തിന് ആവശ്യക്കാർ കുറഞ്ഞതായി വ്യാപാരികൾ പറഞ്ഞു. കഴിഞ്ഞ വർഷം കിലോയ്ക്ക് 80 രൂപയ്ക്ക് വിറ്റിരുന്ന മാമ്പഴം ഇത്തവണ 150 രൂപയ്ക്കാണ് വിൽക്കുന്നത്. എന്നിരുന്നാലും കിലോയ്ക്ക് 100-150 രൂപ നിരക്കിൽ വിൽക്കുന്ന ബംഗനപ്പള്ളി മാമ്പഴ ഇനത്തിന് വിപണിയിൽ ആവശ്യക്കാരേറെയാണെന്ന് വ്യാപാരികൾ പറഞ്ഞു. മല്ലിക ഇനത്തിന് കിലോയ്ക്ക് 180 രൂപയ്ക്കും മൽഗോവ കിലോയ്ക്ക് 200-220 രൂപയ്ക്കും ദശേരി 200 രൂപയ്ക്കും ഇമാം പസന്ദ് കിലോയ്ക്ക് 250 രൂപയ്ക്കുമാണ് വിൽക്കുന്നത്.