കോട്ടയം: വൈക്കത്ത് കാണാതായ വിദ്യാര്ഥിയെ തണ്ണീര്മുക്കം ബണ്ടിനു സമീപം വേമ്പനാട്ടുകായലില് മരിച്ചനിലയില് കണ്ടെത്തി. വൈക്കം കുടവെച്ചൂര് പുതുചിറയില് മനുവിന്റെയും ദീപയുടെയും മകന് കാര്ത്തികാണ് മരിച്ചത്. വൈക്കം വല്ലകം സെയ്ന്റ് മേരീസ് ഹയര്സെക്കന്ഡറി സ്കൂളിലെ 10-ാം ക്ലാസ് വിദ്യാര്ഥിയാണ് പതിനഞ്ചുകാരന്.
ചൊവ്വാഴ്ച രാവിലെ കാര്ത്തിക്കിനെ സ്കൂളില് കൊണ്ടുപോയിവിട്ടിരുന്നു. എന്നാല്, സ്കൂളില്നിന്ന് തിരികെ എത്താത്തതിനെ തുടര്ന്ന് വൈക്കം പോലിസില് പരാതി നല്കുകയായിരുന്നു. ബുധനാഴ്ച രാവിലെ വൈക്കം പോലിസ് നടത്തിയ അന്വേഷണത്തില് തണ്ണീര്മുക്കം ബണ്ടിന് സമീപത്ത് കാര്ത്തിക്കിന്റെ ഒരുചെരുപ്പും ബാഗും മൊബൈല്ഫോണും കണ്ടെത്തി.
തുടര്ന്ന് വൈക്കം അഗ്നിരക്ഷാസേനയെ വിവരം അറിയിച്ചു. സംശയം തോന്നിയ കായലിന്റെ മധ്യഭാഗത്ത് നടത്തിയ തിരച്ചിലില് മറ്റൊരു ചെരുപ്പും കണ്ടെത്തി. തുടര്ന്ന് വിശദമായ തിരച്ചിലിനൊടുവില് ഉച്ചയോടെ കാര്ത്തിക്കിന്റെ മൃതദേഹം കണ്ടെത്തുകയായിരുന്നു. വൈക്കം പോലിസ് തുടര്നടപടി സ്വീകരിച്ചു.
SUMMARY: Missing 15-year-old found dead in lake
