വയനാട്: മുട്ടില്‍ മരംമുറി കേസിലെ പ്രതികളായ അഗസ്റ്റിൻ സഹോദരങ്ങള്‍ കോടതിയില്‍ ഹാജരായി. സുല്‍ത്താൻ ബത്തേരി ജുഡീഷ്യല്‍ ഫസ്റ്റ് ക്ലാസ് മജിസ്ട്രേറ്റ് കോടതിയിലാണ് ഇവർ ഇന്ന് നേരിട്ട് ഹാജരായത്. നീണ്ട ഇടവേളയ്ക്ക് ശേഷമാണ് പ്രതികള്‍ ഈ കേസുമായി ബന്ധപ്പെട്ട കോടതി നടപടികള്‍ക്കായി എത്തുന്നത്. മുട്ടില്‍ മരം മുറിയില്‍ പോലീസ് രജിസ്റ്റർ ചെയ്ത 41 കേസുകളില്‍ 12 കേസുകളാണ് ഇന്ന് പരിഗണിച്ചത്.
പോലീസ് രജിസ്റ്റർ ചെയ്ത 41 കേസുകളില്‍ കുറ്റപത്രം നേരത്തെ സമർപ്പിച്ചിരുന്നു. തുടന്നാണ് പ്രതികള്‍ ബത്തേരി ഫസ്റ്റ് ക്ലാസ് ജുഡീഷ്യല്‍ മജിസ്ട്രേറ്റ് കോടതിയില്‍ ഹാജരായത്. ഈ സാഹചര്യത്തില്‍ വിചാരണനടപടികള്‍ ഇനി വൈകാതെ തുടങ്ങാം. അതേസമയം മുട്ടില്‍ മരംമുറിയുമായി ബന്ധപ്പെട്ട വഞ്ചനാകേസില്‍ പ്രതികളായ അഗസ്റ്റിൻ സഹോദരങ്ങള്‍ക്ക് കഴിഞ്ഞ ദിവസം കോടതിയില്‍ തിരിച്ചടിയേറ്റിരുന്നു.
ചോറ്റാനിക്കര കോടതിയിലെ വിചാരണ നടപടികള്‍ സ്റ്റേ ചെയ്യണമെന്ന ആവശ്യം ഓഗസ്റ്റ് 3 ന് ഹൈക്കോടതി തള്ളിയിരുന്നു. കേസിലെ കുറ്റപ്പത്രം വായിച്ച്‌ കേള്‍പ്പിക്കാൻ വരുന്ന തിങ്കളാഴ്ച ഹാജരാകാൻ പ്രതികള്‍ക്ക് ചോറ്റാനിക്കര കോടതി നിർദ്ദേശം നല്‍കിയിരുന്നു. ഇതിനെതിരെയായിരുന്നു പ്രതികളുടെ നീക്കം.
SUMMARY: Muttil tree-felling case: Augustine brothers appear in court
