സംസ്ഥാനത്തെ കോളേജുകളുടെ പ്രവർത്തനം നിരീക്ഷിക്കാൻ പുതിയ സമിതി രൂപീകരിക്കും

ബെംഗളൂരു: സംസ്ഥാനത്തെ സ്വയംഭരണ കോളേജുകളുടെ പ്രവർത്തനം നിരീക്ഷിക്കാൻ പുതിയ സമിതി രൂപീകരിക്കും. ഫീസ് നിർണയം, പരീക്ഷാ സമ്പ്രദായം, ഫലപ്രഖ്യാപനം എന്നിവയുമായി ബന്ധപ്പെട്ട് ഇത്തരം കോളേജുകളിലെ വീഴ്ചകൾ റിപ്പോർട്ട്‌ ചെയ്തതിന്റെ പശ്ചാത്തലത്തിലാണ് തീരുമാനം. സംസ്ഥാനത്തെ ഏതാനും സ്വയംഭരണ കോളേജുകൾ അതാത് സർവകലാശാലകൾക്ക് അഫിലിയേഷൻ ഫീസ് അടച്ചിട്ടില്ലെന്നും ആരോപണമുണ്ട്.

സംസ്ഥാനത്തെ 4,500-ലധികം കോളേജുകളിൽ 85 എണ്ണത്തിന് മാത്രമേ സ്വയംഭരണ പദവി ലഭിച്ചിട്ടുള്ളു. കൂടുതൽ കോളേജുകൾക്ക് സ്വയംഭരണ പദവി നൽകുന്നത് സർക്കാർ പരിഗണിക്കുന്നുണ്ട്. ഇതിന് മുമ്പായി സ്വയംഭരണ കോളേജുകളെ നിരീക്ഷിക്കാൻ കമ്മിറ്റി രൂപീകരിക്കേണ്ടത് അത്യാവശ്യമാണെന്ന് ഉന്നതവിദ്യാഭ്യാസ മന്ത്രി എം. സി. സുധാകർ പറഞ്ഞു.

സ്വയംഭരണ കോളേജുകൾ അവയുടെ പഠനനിലവാരം നിലനിർത്തേണ്ടത് പ്രധാനമാണ്. ഫീസ് ഘടനയെയും പരീക്ഷാ സമ്പ്രദായത്തെയും കുറിച്ച് വിദ്യാഭ്യാസ വകുപ്പിന് ഇതിനകം നിരവധി പരാതികൾ ലഭിച്ചിട്ടുണ്ട്. ചില കോളേജുകൾ അതാത് സർവകലാശാലകൾക്ക് അഫിലിയേഷൻ ഫീസ് നൽകിയിട്ടില്ല. ഇതുമായി ബന്ധപ്പെട്ട് റിപ്പോർട്ട് സമർപ്പിക്കാൻ സർവകലാശാലകളോട് ആവശ്യപ്പെട്ടിട്ടുണ്ട്. യുജിസി മാർഗനിർദേശങ്ങൾ അനുസരിച്ച് സമഗ്രമായ അവലോകനത്തിന് ശേഷമേ കോളേജുകൾക്ക് സ്വയംഭരണ പദവി നൽകൂവെന്നും മന്ത്രി പറഞ്ഞു.

നാഷണൽ അസസ്‌മെൻ്റ് ആൻഡ് അക്രഡിറ്റേഷൻ കൗൺസിലിൽ (നാക്) കുറഞ്ഞത് എ ഗ്രേഡുള്ള ഏതൊരു കോളേജും സ്വയംഭരണ പദവിക്ക് യോഗ്യമാണെന്നതാണ് നിലവിലെ മാനദണ്ഡം. സ്വയംഭരണ പദവി ലഭിച്ച കോളേജുകൾക്ക് ഗവേണിംഗ് കൗൺസിലുകൾ രൂപീകരിക്കാനും സിലബസ് ക്രമീകരിക്കാനും പരീക്ഷകൾ നടത്താനും ഫലം പ്രഖ്യാപിക്കാനും അനുമതിയുണ്ട്.

TAGS: KARNATAKA | COLLEGES
SUMMARY: Karnataka to form a committee to monitor functioning of colleges