ബെംഗളൂരു: നഗരത്തിലെ കോടതികളിലെ തിരക്ക് കുറയ്ക്കുന്നതിനും നീതിന്യായ സംവിധാനത്തിന് കൂടുതൽ സൗകര്യങ്ങൾ ഒരുക്കുന്നതിനുമായി ബെംഗളൂരുവിലെ റേസ് കോഴ്‌സ് പരിസരത്ത് പുതിയ കർണാടക ഹൈക്കോടതി സമുച്ചയം സ്ഥാപിക്കുന്നതിനുള്ള നടപടികൾ വേഗത്തിലാക്കാൻ സംസ്ഥാന സർക്കാർ നീക്കം നടത്തുന്നു. ബാംഗ്ലൂർ ടർഫ് ക്ലബ്ബിന്റെ ഭൂമിയിൽ പുതിയ സമുച്ചയം നിർമിക്കുന്നതുമായി ബന്ധപ്പെട്ട നടപടികൾ വേഗത്തിലാക്കുമെന്ന് ഡി.കെ. ശിവകുമാർ അറിയിച്ചു.
ഏകദേശം 12 മുതൽ 15 ഏക്കർ വരെ സ്ഥലത്ത് പുതിയ കോടതി സമുച്ചയം സ്ഥാപിക്കാനാണ് പദ്ധതി. നിലവിലെ ഹൈക്കോടതി സമുച്ചയത്തിലെ സ്ഥലപരിമിതിയും വർധിച്ചുവരുന്ന കേസുകളുടെ എണ്ണവും പരിഗണിച്ചാണ് കൂടുതൽ സൗകര്യങ്ങളുള്ള സമുച്ചയം നിർമിക്കാനുള്ള നീക്കം.
പുതിയ ഹൈക്കോടതി സമുച്ചയവുമായി ബന്ധപ്പെട്ട നിർദേശങ്ങൾ അടുത്ത മന്ത്രിസഭാ യോഗത്തിൽ പരിഗണിക്കുമെന്നാണ് റിപ്പോർട്ട്. പദ്ധതിയുടെ തുടർനടപടികൾ, ഭൂമി കൈമാറ്റം, നിർമാണത്തിനുള്ള ഭരണാനുമതികൾ എന്നിവ സംബന്ധിച്ച തീരുമാനങ്ങൾ ഇതിൽ നിർണായകമാകും.
പുതിയ സമുച്ചയം യാഥാർഥ്യമാകുന്നതോടെ കോടതി മുറികൾ, അഭിഭാഷകർക്കുള്ള സൗകര്യങ്ങൾ, കേസുകളുമായി ബന്ധപ്പെട്ട ഭരണവിഭാഗങ്ങൾ, പൊതുജനങ്ങൾക്കുള്ള അടിസ്ഥാന സൗകര്യങ്ങൾ എന്നിവ വിപുലീകരിക്കാൻ കഴിയുമെന്നാണ് പ്രതീക്ഷ. എന്നാൽ നിർമാണച്ചെലവ്, പ്രവൃത്തി ആരംഭിക്കുന്ന തീയതി, പൂർത്തീകരണ സമയപരിധി എന്നിവ സംബന്ധിച്ച അന്തിമ വിവരങ്ങൾ ഇനിയും വ്യക്തമായിട്ടില്ല.
SUMMARY: New High Court complex in the Race Course area
