ന്യൂഡൽഹി: പുതിയ തൊഴിൽ നിയമം, വിബി-ജി റാം ജി നിയമം തുടങ്ങിയവ പിൻവലിക്കണമെന്ന് ആവശ്യപ്പെട്ട് 2026 ഫെബ്രുവരി 12ന് പൊതു പണിമുടക്കിന് ആഹ്വാനം ചെയ്‌ത് ട്രേഡ് യൂണിയനുകളുടെ കൂട്ടായ്‌മ. ജനങ്ങളുടെ അവകാശങ്ങൾക്കു നേരെ മോദി സർക്കാർ നിരന്തരം അക്രമണം അഴിച്ചുവിടുകയാണെന്ന് സെൻട്രൽ ട്രേഡ് യൂണിയനുകളുടെ ജോയിന്റ് പ്ലാറ്റ്ഫോം ആരോപിച്ചു.
ജനുവരി ഒൻപതിന് നടക്കുന്ന നാഷണൽ വർക്കേഴ്സ് കൺവെൻഷനിൽ അഖിലേന്ത്യ പണിമുടക്ക് തീയതി ഔദ്യോഗികമായി അംഗീകരിക്കും. എഐടിയുസി, എച്ച്എംഎസ്, സിഐടിയു, ഐഎൻടിയുസി, എഐയുടിയുസി, ടിയുസിസി, സെവ, എഐസിസിടിയു, എൽപിഎഫ്, യുടിയുസി എന്നീ തൊഴിലാളി സംഘടനകളാണ് ദേശീയ പണിമുടക്ക് ആഹ്വാനം ചെയ്തത്. സംയുക്ത കിസാൻ മോർച്ച (എസ്‌കെഎം) പൊതുപണിമുടക്കിന് നിരുപാധിക പിന്തുണ പ്രഖ്യാപിച്ചു. സംയുക്ത കിസാൻ മോർച്ച ജനുവരി 16ന് രാജ്യവ്യാപക പ്രതിഷേധത്തിന് ആഹ്വാനം ചെയ്‌തിട്ടുണ്ട്.
SUMMARY: New labor law; General strike on February 12
