നോർക്ക റൂട്ട്‌സ് നടപ്പാക്കുന്ന പദ്ധതിയിൽ വിദേശത്തും രാജ്യത്തിനുള്ളിൽ ഇതരസംസ്ഥാനങ്ങളിലും താമസിക്കുന്ന മലയാളികൾക്കും ചേരാം. നോർക്കയുടെ തിരിച്ചറിയൽ കാർഡ് (എൻആർകെ കാർഡ്) എടുത്തിട്ടുള്ളവർക്കാണ് കെയർ ഇൻഷുറൻസിൽ ചേരാൻ സാധിക്കുന്നത്. നിലവിൽ എൻആർകെ കാർഡില്ലത്തവർക്ക് ഓൺലൈൻ മുഖേന ഇതിന് അപേക്ഷിക്കാം. ഇ-കാർഡ് ലഭിച്ചതിനുശേഷം നോർക്ക കെയറിന് അപേക്ഷ സമർപ്പിക്കാം. എൻആർകെ കാർഡുള്ളവർക്ക് അഞ്ചുലക്ഷം രൂപയുടെ അപകട ഇൻഷുറൻസുണ്ട്. അതിനാൽ നോർക്ക കെയർ ഇൻഷുറൻസുള്ളവർക്ക് ഫലത്തിൽ 15 ലക്ഷം രൂപയുടെ അപകട ഇൻഷുറൻസ് പരിരക്ഷയുണ്ടാകും.
പദ്ധതിയില്‍ ചേരുമ്പോള്‍ നിലവിലുള്ള രോഗങ്ങൾക്ക് പോലും ഇൻഷുറൻസ് ലഭിക്കും എന്നതാണ് നോർക്ക കെയർ പ്രവാസി ഇൻഷുറൻസിനെ വേറിട്ടതാക്കുന്നത്. അഞ്ച് ലക്ഷം രൂപയുടെ വരെ ചികിത്സ. ഭർത്താവും ഭാര്യയും രണ്ട് മക്കളുള്ള (25 വയസ് വരെയുള്ള) കുടുംബത്തിന് ജിഎസ്ടി ഉൾപ്പെടെ 13,275 രൂപയാണ് വാർഷിക പ്രീമിയം. അധികമായി ചേർക്കുന്ന ഒരോ കൂട്ടിക്കും 4,130 രൂപ വീതം നൽകണം. വ്യക്തിഗത ഇൻഷുറൻസ് മാത്രമാണെങ്കിൽ 7,965 രൂപ മതി. ഇന്ത്യയിലുടനീളം 12,000-ത്തിലധികം ആശുപത്രികളിൽ കാഷ്‌ലെസ് ചികിത്സ ലഭ്യമാക്കും.
ബെംഗളൂരു, ഹൈദരാബാദ്, ചെന്നൈ, മുംബൈ അടക്കം രാജ്യത്തെ പ്രധാന നഗരങ്ങളിലെ പ്രമുഖ ആശുപത്രികളിൽ ഇൻഷുറൻസ് പ്രകാരം കാഷ്‌ലെസ് ചികിത്സ ലഭ്യമായിരിക്കും. അതുകൊണ്ട് തന്നെ നോർക്ക കെയർ ആരോഗ്യ ഇൻഷുറൻസ് ഏറ്റവും ഗുണകരമാകുന്നത് രാജ്യത്തിനുള്ളിൽ ഇതരസംസ്ഥാനങ്ങളിൽ താമസിക്കുന്ന പ്രവാസികൾക്കാണ്. ആശുപത്രികളുടെ പട്ടിക പിന്നീട് നോർക്ക വെബ്‌സൈറ്റിൽ പ്രസിദ്ധീകരിക്കും. 70 വയസ്സുവരെ പ്രായമുള്ളവർക്ക് ഇൻഷുറൻസിൽ ചേരാമെന്ന പ്രത്യേകതയുമുണ്ട്. മറ്റ് മിക്ക ആരോഗ്യ ഇൻഷുറൻസുകളും 60 വയസ്സിന് മുകളിൽ പ്രായമുള്ളവരെ ഫാമിലി ഫ്ളോട്ടർ പോളിസികളിൽ ഉൾപ്പെടുത്തില്ല. ഉൾപ്പെടുത്തിയാലും വൻതുകയായിരിക്കും പ്രീമിയം.
എൻആർകെ കാർഡിനായി നോർക്ക റൂട്ട്സിന്റെ ഔദ്യോഗിക വെബ് സൈറ്റായ www.norkaroots.org വഴി ബന്ധപ്പെട്ട രേഖകൾ അടക്കം അപേക്ഷ സമർപ്പിക്കാം. കൂടുതല്‍ വിവരങ്ങള്‍ക്ക് 24 മണിക്കൂറും പ്രവർത്തിക്കുന്ന നോർക്ക ഗ്ലോബൽ കോൺടാക്ട് സെന്ററിന്റെ 1800 425 3939 എന്ന ടോൾ ഫ്രീ നമ്പറിൽ ബന്ധപ്പെടാം. ബെംഗളൂരുവിലെ നോർക്ക ഓഫീസ് നമ്പര്‍: 080-25585090.
SUMMARY: Norka Health Insurance to support expatriates; 5 lakh medical assistance scheme