കള്ളവോട്ട് ആരോപണം: തിരഞ്ഞെടുപ്പ് കമ്മിഷനെതിരായ ഏറ്റുമുട്ടൽ കടുപ്പിച്ച് ബെംഗളൂരുവിൽ നാളെ രാഹുൽ ഗാന്ധിയുടെ പ്രതിഷേധം

ബെംഗളൂരു: ലോക്സഭാ തിരഞ്ഞെടുപ്പിൽ ബെംഗളൂരു സെൻട്രൽ മണ്ഡലത്തിലെ മഹാദേവപുരയിൽ ക്രമക്കേട് നടന്നെന്ന തെളിവുകൾ പുറത്തുവിട്ടതിനു പിന്നാലെ ലോക്സഭയിലെ പ്രതിപക്ഷനേതാവ് രാഹുൽഗാന്ധി പ്രതിഷേധവുമായി തെരുവിലേക്ക്. നാളെ ബെംഗളൂരുവിലെ ഫ്രീഡം പാർക്കിൽ രാഹുൽ നയിക്കുന്ന പ്രതിഷേധത്തിൽ എഐസിസി അധ്യക്ഷൻ മല്ലികാർജുൻ ഖർഗെ, മുഖ്യമന്ത്രി സിദ്ധരാമയ്യ, ഉപമുഖ്യമന്ത്രി ഡി.കെ.ശിവകുമാർ എന്നിവർ പങ്കെടുക്കും.

തുടർന്ന് പ്രതിഷേധ റാലിയായി ശേഷാദ്രി റോഡിലെ തിരഞ്ഞെടുപ്പ് കമ്മിഷൻ ഓഫിസിലെത്തി ക്രമക്കേടിന്റെ തെളിവുകൾ സമർപ്പിക്കും. രാഹുൽ മാധ്യമങ്ങളുമായും സംസാരിക്കും.

മഹാദേവപുര മണ്ഡലത്തിൽ മാത്രം ഒരു ലക്ഷത്തിലധികം കള്ളവോട്ട് ചേർത്തെന്നാണ് രാഹുൽ ആരോപിക്കുന്നത്. വ്യാജവിലാസങ്ങളില്‍ വന്‍തോതില്‍ വോട്ടര്‍മാര്‍, ഒരേവിലാസത്തില്‍ നിരവധി വോട്ടര്‍മാര്‍, ഒരാള്‍ക്ക് മൂന്ന് സംസ്ഥാനത്ത് വരെ വോട്ട് എന്നിങ്ങനെയുള്ള ആരോപണങ്ങൾ തെളിയിക്കുന്ന രേഖകളും രാഹുൽ പുറത്തുവിട്ടിട്ടുണ്ട്.

SUMMARY: Rahul Gandhi to escalate fight against poll panel with protest in Bengaluru tomorrow.