റെയിൽവേയുടെ പുതുവത്സര സമ്മാനം; വിവിധ ട്രെയിനുകളുടെ യാത്ര സമയം കുറച്ചു

തിരുവനന്തപുരം: പുതുവത്സരത്തിൽ മലയാളികൾക്ക് സമ്മാനവുമായി ഇന്ത്യൻ റെയിൽവേ. മലയാളികൾ കൂടുതലായി ആശ്രയിക്കുന്ന കൊല്ലം-ചെന്നെെ എക്‌സ്‌പ്രസിന്റെ യാത്ര സമയം ഒരു മണിക്കൂർ 25 മിനിട്ട് കുറച്ചു. രാവിലെ 7.30ന് താംബരത്ത് എത്തിയിരുന്ന ട്രെയിൻ ഇനി മുതൽ രാവിലെ 6.05ന് എത്തും. ഇതോടെ സംസ്ഥാനത്തെ തെക്കൻ ജില്ലകളിൽ നിന്ന് ചെന്നെെയിലേക്ക് ഏറ്റവും വേഗത്തിലെത്തുന്ന ട്രെയിനായി കൊല്ലം – ചെന്നെെ എക്സ്‌പ്രസ് മാറും.

ഗുരുവായൂർ എക്സ്പ്രസ്, മംഗളൂരു സെൻട്രൽ എക്സ്പ്രസ്, കൊല്ലം എക്സ്പ്രസ് തുടങ്ങിയ ട്രെയിനുകൾ ജനുവരി ഒന്നു മുതൽ കൂടുതൽ വേഗത്തിൽ എത്തുമെന്നാണ് റെയിൽവേ മുന്നറിയിപ്പ് നൽകിയിട്ടുണ്ട്.

എഗ്മോറിൽ നിന്നും രാത്രി 10.20ന് പുറപ്പെട്ടിരുന്ന ഗുരുവായൂർ എക്സ്പ്രസ് ഇനിമുതൽ 10.40നാണ് പുറപ്പെടുക. ഈ ട്രെയിൻ ഗുരുവായൂരിൽ എത്തിച്ചേരുന്ന സമയത്തിൽ മാറ്റം വന്നിട്ടില്ല. എഗ്മോറിൽ നിന്നും രാത്രി 8.45ന് പുറപ്പെട്ടിരുന്ന മംഗലാപുരം എക്സ്പ്രസ് ഇനിമുതൽ 9.05നായിരിക്കും പുറപ്പെടുക. അതേസമയം യാത്രക്കാർക്ക് സൗകര്യപ്രദമായ രീതിയിൽ പുനലൂരിൽ നിന്നും പുറപ്പെടുന്ന ഗുരുവായൂർ മധുര എക്സ്പ്രസ്‌, കൊല്ലം മെമു എന്നീ ട്രെയിനുകളുടെ സമയക്രമത്തിലും മാറ്റം വരുത്തിയിട്ടുണ്ട്.
SUMMARY: Railways’ New Year gift; Travel time of various trains reduced