മംഗളൂരു: തമിഴ്നാട്ടില് നിന്നും കേരളത്തിലേക്കുള്ള പുതിയ രണ്ട് ട്രെയിനുകള് പ്രധാനമന്ത്രി നരേന്ദ്ര മോദി തിരുച്ചിറപ്പള്ളിയില് ഫ്ളാഗ് ഓഫ് ചെയ്തു. മംഗളൂരു-രാമേശ്വരം, മംഗളൂരു-തിരുനല്വേലി എന്നീ പ്രതിവാര എക്സ്പ്രസുകളാണ് സര്വീസ് തുടങ്ങുന്നത്. രാമേശ്വരം ട്രെയിനിന് കേരളത്തില് ആറ് സ്റ്റോപ്പുകളാണുള്ളത്. തിരുനല്വേലി എക്സ്പ്രസിന് 11 സ്റ്റോപ്പുകള് അനുവദിച്ചിട്ടുണ്ട്.
മംഗളൂരു-രാമേശ്വരം പ്രതിവാര എക്സ്പ്രസ് (16622) എല്ലാ ശനിയാഴ്ചകളിലും രാമേശ്വരം-മംഗളൂരു എക്സ്പ്രസ് (16621 എല്ലാ ഞായറാഴ്ചകളിലും സർവീസ് നടത്തും. ശനിയാഴ്ച രാത്രി 7.30-ന് മംഗളൂരുവിൽ നിന്ന് തിരിക്കുന്ന ട്രെയിന് പിറ്റേന്ന് രാവിലെ 10.50-ന് രാമേശ്വരത്തെത്തും. ഞായറാഴ്ചകളിൽ വൈകീട്ട് 3.30-ന് രാമേശ്വരത്തുനിന്ന് തിരിക്കുന്ന ട്രെയിന് പിറ്റേദിവസം രാവിലെ 6.55-ന് മംഗളൂരു സെൻട്രൽ സ്റ്റേഷനിലെത്തും.
രാമനാഥപുരം, പരമകുടി, മാനമധുര, മധുര, ദിണ്ടിക്കൽ, ഒട്ടൻഛത്രം, പളനി, ഉദുമൽപേട്ട, പൊള്ളാച്ചി, പാലക്കാട്, ഷൊർണൂർ, തിരൂർ, കോഴിക്കോട്, കണ്ണൂർ, കാസറഗോഡ് എന്നിവിടങ്ങളിൽ സ്റ്റോപ്പുണ്ടാകും.
തിരുനെൽവേലിയിൽനിന്ന് ബുധനാഴ്ചകളിൽ ഉച്ചയ്ക്കുശേഷം 3.45-ന് പുറപ്പെടുന്ന മംഗളൂരു ജങ്ഷൻ എക്സ്പ്രസ് (16708) പിറ്റേന്ന് രാവിലെ 6.55-ന് മംഗളൂരുവിലെത്തും. വ്യാഴാഴ്ച ഉച്ചയ്ക്ക് ഒരുമണിക്ക് മംഗളൂരു ജങ്ഷനിൽനിന്ന് തിരിക്കുന്ന ട്രെയിന് (16707) പിറ്റേന്ന് രാവിലെ 7.45-ന് തിരുനെൽവേലിയിലെത്തും. കോവിൽപ്പെട്ടി, സാത്തൂർ, വിരുദുനഗർ, മധുര, ദിണ്ടിഗൽ, ഒട്ടൻഛത്രം, പളനി, ഉദുമൽപേട്ട, പൊള്ളാച്ചി, കൊല്ലങ്കോട്, പാലക്കാട് ടൗൺ, പാലക്കാട്, ഷൊർണൂർ, തിരൂർ, കോഴിക്കോട്, വടകര, തലശ്ശേരി, കണ്ണൂർ, കാഞ്ഞങ്ങാട്, കാസറഗോഡ് എന്നിവിടങ്ങളിൽ സ്റ്റോപ്പുണ്ടാകും.
SUMMARY: Rameswaram-Mangalore, Tirunelveli-Mangalore Expresses start service; stops and timings are as follows
