കൈതി 2നു മുമ്പേ സർദാർ രണ്ടാം ഭാഗം; പ്രോലോഗ് ടീസർ പുറത്ത്

കൈതി 2നു മുമ്പേ സർദാർ രണ്ടാം ഭാഗത്തിന്റെ പ്രോലോഗ് ടീസർ പുറത്ത്. കാർത്തി ഡബിൾ റോളിലെത്തി വൻ വിജയം നേടിയ ചിത്രമാണ് സർദാർ. ടീസറിൽ ചൈനയിൽ നിന്നുള്ള സംഘട്ടന രംഗമാണ് പ്രധാനമായും കാണിച്ചിരിക്കുന്നത്. പി.എസ് മിത്രൻ സംവിധാനം ചെയ്യുന്ന ചിത്രത്തിൽ അഷിക രഘുനാഥ്, മാളവിക മോഹൻ, രജിഷ വിജയൻ എന്നിവരും പ്രധാന വേഷങ്ങളിലെത്തുന്നുണ്ട്. സാം സി.എസ് സംഗീത സംവിധാനം ചെയ്യുന്ന സർദാർ 2 നിർമ്മിക്കുന്നത് പ്രിൻസ് പിക്‌ചേഴ്‌സും, ഇവി എന്റെർറ്റൈന്മെന്റ്സും ചേർന്നാണ്.

അന്താരാഷ്ട്ര തലത്തിലുള്ള രാഷ്ട്രീയ പ്രശ്നങ്ങളാണ് ഇത്തവണ ചിത്രം ചർച്ചയാക്കുന്നത്. സർദാറിലെ കാർത്തി അഭിനയിച്ച പോലീസ് ഉദ്യോഗസ്ഥന്റെ കഥാപാത്രത്തെയും ചിത്രത്തിൽ വില്ലൻ വേഷത്തിലെത്തുന്ന എസ്.ജെ സൂര്യയുടെ കഥാപാത്രത്തെയും ടീസർ അവസാനിക്കുമ്പോൾ കാണിക്കുന്നുണ്ട്. ചിത്രത്തിന്റെ 177 സെക്കൻഡ് ദൈർഘ്യമുള്ള ടീസറാണ് പുറത്തിറക്കിയിരിക്കുന്നത്. ബ്രഹ്മാണ്ഡ ചിത്രമായിരിക്കും സർദാർ 2 എന്ന സൂചനയാണ് ടീസർ പങ്കുവയ്ക്കുന്നത്. ലോകേഷ് കനഗരാജ് സംവിധാനം ചെയ്യുന്ന കൈതി 2 ആണ് കാർത്തി അടുത്തതായി അഭിനയിക്കുന്ന ചിത്രം.

TAGS: CINEMA
SUMMARY: Sardar 2 prologue teaser out