ഡല്‍ഹി: സ്റ്റേറ്റ് ബാങ്ക് ഓഫ് ഇന്ത്യയുടെ (എസ്ബിഐ) 3,897 ഉപഭോക്താക്കളുടെ വ്യക്തിഗത വിവരങ്ങള്‍ ഡാർക്ക് വെബില്‍ ചോർന്നതായി സംശയം. ബാങ്കിന് നേർക്ക് ഉണ്ടായ സൈബർ ആക്രമണം ആണിതെന്നാണ് എസ്ബിഐയുടെ വിലയിരുത്തല്‍. സംഭവത്തില്‍ ബാങ്ക് അന്വേഷണം ആരംഭിച്ചു.
ഡാർക്ക് വെബില്‍ ലഭ്യമായിരുന്ന ഏകദേശം 3.75 ലക്ഷം രേഖകളുടെ പ്രാഥമിക പരിശോധനയില്‍ 3,897 ഉപഭോക്താക്കളുടെ സെൻസിറ്റീവ് വിവരങ്ങള്‍ കണ്ടെത്തിയതായി ബുധനാഴ്ച റെഗുലേറ്ററി ഫയലിങ്ങില്‍ എസ്ബിഐ അറിയിച്ചു. രജിസ്റ്റർ ചെയ്ത മൊബൈല്‍ നമ്പറുകള്‍, ജനനത്തീയതി, പേര്, ലിംഗം, ഇമെയില്‍ വിലാസം, താമസവിലാസം തുടങ്ങിയ വിവരങ്ങള്‍ ഇതില്‍ ഉള്‍പ്പെടുന്നു.
ചോർന്ന വിവരങ്ങളുടെ ആധികാരികതയും പൂർണതയും സ്ഥിരീകരിക്കേണ്ടതുണ്ടെന്ന് ബാങ്ക് വ്യക്തമാക്കി. വിവരങ്ങള്‍ ചോർന്നതിന്‍റെ ഉറവിടം, വ്യാപ്തി, ഉപഭോക്താക്കള്‍ക്കും ബാങ്കിനുമുണ്ടാകാവുന്ന അപകടസാധ്യതകള്‍ എന്നിവയും വിശദമായ അന്വേഷണത്തിലൂടെ വിലയിരുത്തും.
സംഭവത്തെ തുടർന്ന് സൈബർ സുരക്ഷാ പ്രതിരോധ നടപടികളും വിവരച്ചോർച്ച നിയന്ത്രിക്കാനുള്ള പ്രോട്ടോക്കോളുകളും ഉടൻ സജീവമാക്കിയതായി എസ്ബിഐ അറിയിച്ചു. സംഭവത്തില്‍ സമഗ്രമായ പരിശോധന നടത്താനും സുരക്ഷാവീഴ്ച അന്വേഷിക്കാനും സ്വതന്ത്ര സൈബർ സുരക്ഷാ ഏജൻസിയെയും നിയോഗിച്ചിട്ടുണ്ട്.
SUMMARY: SBI confirms cyberattack; data of 3,897 customers leaked
