സമത്വത്തെ എതിര്‍ക്കുന്നവര്‍ സര്‍വേയെ എതിര്‍ക്കുന്നുവെന്ന് മുഖ്യമന്ത്രി സിദ്ധരാമയ്യ

ബെംഗളൂരു: സാമൂഹിക-സാമ്പത്തിക, വിദ്യാഭ്യാസ സര്‍വേയെ എതിര്‍ക്കുന്നവര്‍ സമത്വത്തെ എതിര്‍ക്കുന്നവരാണെന്ന് മുഖ്യമന്ത്രി സിദ്ധരാമയ്യ. ഒരു ജാതിയെയും സര്‍വേയിലൂടെ ചവിട്ടിമെതിക്കുന്ന പ്രശ്നമില്ലെന്നും, തുല്യ സമൂഹം ആഗ്രഹിക്കാത്തവരാണ് ഇതിനെ എതിര്‍ക്കുന്നതെന്നും അദ്ദേഹം പറഞ്ഞു. ഉന്നത ജാതിക്കാരെ ചവിട്ടിമെതിക്കാനാണ് സര്‍വേ നടത്തുന്നതെന്ന കേന്ദ്രമന്ത്രി വി സോമണ്ണയുടെ ആരോപണത്തോട് പ്രതികരിച്ച്, സാമ്പത്തിക, സാമൂഹിക, വിദ്യാഭ്യാസ സര്‍വേ നടത്തിയില്ലെങ്കില്‍, സമൂഹത്തിലെ ജനങ്ങളുടെ അവസ്ഥയെക്കുറിച്ച് അറിവ് കുറവായിരിക്കുമെന്ന് മുഖ്യമന്ത്രി പറഞ്ഞു.

തുല്യ സമൂഹം സൃഷ്ടിക്കുന്നതിനെ എതിര്‍ക്കുന്നവര്‍ ഇത്തരം പ്രസ്താവനകള്‍ നടത്തി ജനങ്ങളെ തെറ്റിദ്ധരിപ്പിക്കുകയാണ്. 1.10 കോടി കുടുംബങ്ങളുടെ സര്‍വേ പ്രവര്‍ത്തനങ്ങള്‍ ഇതിനകം പൂര്‍ത്തിയായി, ഞായറാഴ്ച വരെ സര്‍വേ ജോലിയുടെ 63 ശതമാനം പൂര്‍ത്തിയായി. ചൊവ്വാഴ്ച വൈകുന്നേരത്തോടെ സര്‍വേയുടെ പുരോഗതി അവലോകനം ചെയ്യുമെന്നും ആവശ്യമെങ്കില്‍ അത് നീട്ടുന്നതിനെക്കുറിച്ച് തീരുമാനമെടുക്കുമെന്നും സിദ്ധരാമയ്യ പറഞ്ഞു.
SUMMARY: Those who oppose equality are opposing the survey, says Chief Minister Siddaramaiah