വിഗ്രഹനിമജ്ജന ഘോഷയാത്രയിൽ ട്രക്ക് പാഞ്ഞുകയറിയുണ്ടായ ദുരന്തം; മരണം പത്തായി, മരിച്ച ഒമ്പത് പേർ യുവാക്കള്‍

ബെംഗളൂരു: ഹാസനിൽ ഗണേശോത്സവത്തിന്റെ ഭാഗമായ വിഗ്രഹനിമജ്ജന ഘോഷയാത്രയിലേക്ക് ട്രക്ക് നിയന്ത്രണംവിട്ട് പാഞ്ഞുകയറിയുണ്ടായ ദുരന്തത്തിൽ മരണം ഒൻപതായി. അപകടത്തില്‍ മരണപ്പെട്ട പത്ത് പേരില്‍ ഒമ്പത് പേര്‍ 17 നും 27 നും ഇടയിൽ പ്രായമുള്ളവരാണ്. ഇവരില്‍ മൂന്ന് പേർ – മിഥുൻ, സുരേഷ്, പ്രവീൺ – മൊസാലെ ഹൊസഹള്ളിയിലെ ഗവൺമെന്റ് എഞ്ചിനീയറിംഗ് കോളേജിലെ വിദ്യാർഥികളും, രണ്ട് പേർ – ഗോകുൽ, ഈശ്വര്‍ – ഗവൺമെന്റ് ഫസ്റ്റ് ഗ്രേഡ് കോളേജിലെ വിദ്യാർഥികളുമാണ്. കോളേജ് ഹോസ്റ്റലില്‍ നിന്നും അത്താഴത്തിന് പുറത്തിറങ്ങിയ ഇവര്‍ ഘോഷയാത്രയിലും ഡിജെ സംഗീതത്തിലും പങ്കുചേരുകയായിരുന്നു.

അപകടത്തില്‍ പരുക്കേറ്റ 20 പേരില്‍ 18 പേർ ഹാസൻ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിലാണുള്ളത്. ചിലരുടെ നില ഇപ്പോഴും ഗുരുതരമായി തുടരുകയാണ്. ഇവരുടെ ആരോഗ്യനില ജില്ലാ മെഡിക്കൽ ഓഫീസറുടെ നേതൃത്വത്തിലുള്ള ഡോക്ടർമാരുടെ സംഘം നിരീക്ഷിച്ചുവരുകയാണെന്ന് ജില്ലയുടെ ചുമതലയുള്ള മന്ത്രി കൃഷ്ണബൈരെഗൗഡ അറിയിച്ചു.