ബെംഗളൂരുവിൽ ഷട്ടിൽ ബസ് സർവീസ് പദ്ധതി നടപ്പാക്കാനൊരുങ്ങി ഊബർ

ബെംഗളൂരു: ബെംഗളൂരുവിൽ ഷട്ടിൽ ബസ് സർവീസ് പദ്ധതി നടപ്പാക്കാനൊരുങ്ങി ഊബർ. സർക്കാരിൽ നിന്ന് അനുകൂല നിലപാട് ലഭിച്ചാൽ അടുത്ത വർഷത്തോടെ പദ്ധതി നടപ്പാക്കുമെന്ന് ഊബർ അറിയിച്ചു. വ്യക്തിഗത വാഹനങ്ങൾ ഒഴിവാക്കി യാത്രക്കാരെ ബസിലേക്ക് ആകർഷിക്കാനാണ് ഊബർ ലക്ഷ്യമിടുന്നത്. ഇതോടെ ബെംഗളൂരു നഗരത്തിലെ തിരക്ക് ഒരു പരിധിവരെ കുറയ്ക്കാൻ സഹായിക്കും.

200 എയർകണ്ടീഷൻ ബസുകൾ നിരത്തിലിറക്കാനാണ് ഊബർ പദ്ധതിയിടുന്നത്. ഐടി ജീവനക്കാർ ഉൾപ്പെടെയുള്ളവർക്ക് ഏറെ സൗകര്യമാകുന്ന ഷട്ടിൽ ബസ് സർവീസ് 2 – 3 മിനിറ്റ് ഇടവേളകളിൽ അതാത് റൂട്ടുകളിലൂടെ സർവീസ് നടത്തും. ടിക്കറ്റ് മുൻകൂട്ടി ബുക്ക് ചെയ്യാനുള്ള അവസരവും ഊബർ ക്രമീകരിച്ചിട്ടുണ്ട്.

ബെംഗളൂരുവിൽ ഷട്ടിൽ സർവീസ് നടത്താനുള്ള സർക്കാർ അനുവാദം വൈകാതെ ലഭിക്കുമെന്ന് ഊബർ ഇന്ത്യയുടെയും ദക്ഷിണേഷ്യയുടെയും റീജിയണൽ ബിസിനസ് ഓപ്പറേഷൻസ് മേധാവി അഭിഷേക് പാധ്യേ പറഞ്ഞു. കൊൽക്കത്തയിലും ഡൽഹിയിലും ഷട്ടിൽ ബസ് സർവീസ് മികച്ച രീതിയിൽ നടക്കുന്നുണ്ട്. പദ്ധതി ബെംഗളൂരുവിലും എത്തുന്നതോടെ നഗരത്തിലെ തിരക്ക് പരിഹരിക്കാൻ സഹായകരമാകുമെന്ന് അദ്ദേഹം കൂട്ടിച്ചേർത്തു.

TAGS: BENGALURU | UBER
SUMMARY: Uber eyes Bengaluru for its shuttle bus services