പറയാനുള്ളത് കോടതിയില്‍ പറയും: ശബരിമല സ്വര്‍ണപ്പാളി വിവാദത്തില്‍ പ്രതികരിച്ച്‌ ഉണ്ണികൃഷ്ണൻ പോറ്റി

പത്തനംതിട്ട: ശബരിമലയിലെ സ്വർണ്ണപ്പാളി വിവാദത്തില്‍ ആരോപണവിധേയനായ ഉണ്ണികൃഷ്ണൻ പോറ്റി പ്രതികരണവുമായി രംഗത്ത്. താൻ നിരപരാധിയാണെന്നും, മാധ്യമങ്ങളില്‍ നിന്ന് സ്വകാര്യത ലഭിക്കണമെന്നും അദ്ദേഹം ആവശ്യപ്പെട്ടു.

അതേസമയം, ഉണ്ണികൃഷ്ണൻ പോറ്റിയുടെ സാമ്പത്തിക ഇടപാടുകളിലെ ദുരൂഹതയുടെ പശ്ചാത്തലത്തില്‍, കേസിൻ്റെ അന്വേഷണം ബെംഗളൂരുവിലേക്ക് വ്യാപിപ്പിക്കാനൊരുങ്ങിയിരിക്കുകയാണ് വിജിലൻസ്. സ്വർണ്ണപ്പാളി വിഷയത്തില്‍ താൻ തെറ്റുകാരനല്ലെന്ന് ഉണ്ണികൃഷ്ണൻ പോറ്റി മാധ്യമങ്ങളോട് വ്യക്തമാക്കി. തന്നെ കോടതി ശിക്ഷിച്ചിട്ടില്ലെന്ന് അദ്ദേഹം ആവർത്തിച്ചു.

തനിക്കും കുടുംബത്തിനും സ്വകാര്യത നല്‍കണമെന്ന് അഭ്യർത്ഥിച്ച അദ്ദേഹം, വിജിലൻസ് ഹാജരാകാൻ ആവശ്യപ്പെട്ടാല്‍ താൻ തീർച്ചയായും ഹാജരാകുമെന്നും കൂട്ടിച്ചേർത്തു. എന്നാല്‍, വിജിലൻസ് നിലവില്‍ ഹാജരാകാൻ ആവശ്യപ്പെട്ടിട്ടുണ്ടോ എന്ന മാധ്യമങ്ങളുടെ ചോദ്യത്തിന് ഉണ്ണികൃഷ്ണൻ പോറ്റി മറുപടി നല്‍കിയില്ല.

വിവാദത്തില്‍ പ്രതികരണവുമായി ദേവസ്വം ബോർഡ് പ്രസിഡൻ്റ് പി.എസ്. പ്രശാന്തും രംഗത്തെത്തി. വിഷയത്തെക്കുറിച്ച്‌ സമഗ്രമായ അന്വേഷണം ആവശ്യപ്പെടുമെന്ന് അദ്ദേഹം അറിയിച്ചു. ശബരിമലയിലെ സ്വർണ്ണ ഇടപാടുമായി ബന്ധപ്പെട്ട രജിസ്റ്റർ കൃത്യമാണ് എന്നും, എന്നാല്‍ ഇക്കാര്യം കോടതിയെ ബോധ്യപ്പെടുത്തുന്നതില്‍ ഉദ്യോഗസ്ഥർക്ക് വീഴ്ച സംഭവിച്ചുവെന്നും അദ്ദേഹം പറഞ്ഞു.

SUMMARY: Unnikrishnan Potty responds to Sabarimala gold-plated controversy