നിക്ഷേപതട്ടിപ്പ്; യുവതി ഉൾപ്പെടെ ഏഴ് പേർ അറസ്റ്റിൽ

ബെംഗളൂരു: ബെംഗളൂരുവിൽ നിക്ഷേപതട്ടിപ്പുമായി ബന്ധപ്പെട്ട് യുവതി ഉൾപ്പെടെ ഏഴ് പേർ പിടിയിൽ. ചന്നരായപട്ടണ സ്വദേശിനി കൽപന (47), സുഹൃത്തുക്കളായ ആറു പേർ എന്നിവരാണ് അറസ്റ്റിലായത്. ഉയർന്ന വരുമാനം വാഗ്ദാനം ചെയ്ത് കോടിക്കണക്കിന് രൂപയാണ് പ്രതികൾ പലരിൽ നിന്നുമായും തട്ടിയെടുത്തത്.

മൾട്ടി ലെവൽ മാർക്കറ്റിംഗ് ടൈപ്പ് മണി ഡബിൾ സ്കീം വഴി ഉയർന്ന റിട്ടേൺ വാഗ്ദാനം ചെയ്താണ് ഇരകളെ ഇവർ കബളിപ്പിച്ചത്. പിന്നീട് പണം തിരികെ ചോദിക്കുന്നവരോട് തൻ്റെ പണം ഇഡി പിടിച്ചെടുത്തുവെന്നും ആർബിഐയിൽ നിക്ഷേപിച്ചെന്നുമാണ് പറഞ്ഞിരുന്നത്.

ഹെബ്ബാൾ സ്വദേശി ജയന്ത് നൽകിയ പരാതിയിലാണ് തട്ടിപ്പ് പുറത്താകുന്നത്. ജയന്തിൽ നിന്നും നാല് കോടി രൂപയോളമാണ് പലതവണയായി പ്രതികൾ വാങ്ങിയത്. എന്നാൽ അടുത്തിടെ പണം തിരിച്ചു ചോധിച്ചപോൾ തൻ്റെ പണം എൻഫോഴ്‌സ്‌മെൻ്റ് ഡയറക്ടറേറ്റും ആർബിഐയും പിടിച്ചെടുത്തുവെന്നും ഫണ്ട് പരിശോധനയ്ക്ക് ശേഷം റിലീസ് ചെയ്തുകഴിഞ്ഞാൽ ഉയർന്ന റിട്ടേൺ നൽകുമെന്നുമായിരുന്നു പ്രതികളുടെ മറുപടി.

ഇതിൽ സംശയം തോന്നിയ ജയന്ത് പോലീസിനെ സമീപിക്കുകയായിരുന്നു. കഴിഞ്ഞ ആറ് വർഷത്തിനിടെ നിരവധി പേരെ കബളിപ്പിച്ച് 23 കോടിയോളം രൂപ ഇവർ തട്ടിയെടുത്തതായി പോലീസ് പറഞ്ഞു.

TAGS: KARNATAKA | MONEY FRAUD
SUMMARY: Woman among seven arrested for duping people of crores