ബെംഗളൂരുവിൽ നടുറോഡിൽ യുവതിക്കെതിരെ ലൈംഗികാതിക്രമം; 2 പേർ കസ്റ്റഡിയിൽ

ബെംഗളൂരു: ജിഗനിയിൽ 26 വയസ്സുകാരിയെ നടുറോഡിൽവച്ച് ലൈംഗികമായി അതിക്രമിച്ചതായി പരാതി. ഞായറാഴ്ച വൈകുന്നേരം 4ന് മൈലസന്ദ്രയ്ക്കു സമീപം പ്രഭാകർ റെഡ്ഡി ലേഔട്ടിലാണ് സംഭവം.

2 കുട്ടികളുടെ അമ്മയും ബ്യൂട്ടീഷനുമായ യുവതിയാണ് ആക്രമണത്തിന് ഇരയായത്. കടയിലേക്കു പോകുകയായിരുന്ന യുവതിയെ ഒരു സംഘം തടഞ്ഞു നിർത്തി ശരീരത്തിൽ തൊടാൻ ശ്രമിച്ചു. രക്ഷപ്പെടാൻ ശ്രമിക്കുന്നതിനിടെ മർദിക്കുകയായിരുന്നു. ഒരു ഇരുചക്രവാഹന യാത്രക്കാരനാണ് യുവതിയെ ഇവിടെ നിന്ന് രക്ഷപ്പെടുത്തിയത്. എന്നാൽ യുവതിയെ പിന്തുടർന്ന അക്രമികൾ വീട്ടിൽ എത്തി ബഹളമുണ്ടാക്കിയതായും പരാതിയുണ്ട്.

സംഭവത്തിന്റെ സിസിടിവി ദൃശ്യങ്ങൾ പുറത്തു വന്നതോടെയാണ് പൊലീസ് കേസെടുത്തത്. ബിസിനസുകാരനായ കനിക്യ സ്വാമി, മകൻ ജോൺ റിച്ചാർഡ്(24) എന്നിവരെ പോലീസ് കസ്റ്റഡിയിലെടുത്തു. ഇവരെ ചോദ്യം ചെയ്ത് വരികയാണെന്നും മറ്റു പ്രതികൾക്കായി തിരച്ചിൽ തുടരുകയാണെന്നും പോലീസ് അറിയിച്ചു.

SUMMARY: Women molested and assaulted by a group of men.