2025-ലെ സ്കൈട്രാക്സ് വേൾഡ് എയർപോർട്ട് അവാർഡ് പ്രകാരം, ലോകത്തിലെ ഏറ്റവും വൃത്തിയുള്ള വിമാനത്താവളങ്ങളുടെ പട്ടികയിൽ ആദ്യത്തെ പത്തിൽ ഒൻപതും നേടി ഏഷ്യൻ രാജ്യങ്ങൾ. ശുചിത്വത്തിനും യാത്രാനുഭവത്തിനും ഏറ്റവും വലിയ പ്രാധാന്യം നൽകുന്ന ഈ വിമാനത്താവളങ്ങൾ ആഗോളതലത്തിൽ പുതിയ മാനദണ്ഡങ്ങൾ സൃഷ്ടിക്കുകയാണ്.
ഒന്നാം സ്ഥാനം ടോക്കിയോയിലെ ഹനേഡ എയർപോർട്ടിന്
ശുചിത്വത്തിൽ ലോകത്ത് ഒന്നാം സ്ഥാനത്തെത്തിയത് ജപ്പാനിലെ ടോക്കിയോ ഹനേഡ എയർപോർട്ടാണ്. വൃത്തിയും കാര്യക്ഷമതയും ഒരുപോലെ നിലനിർത്തുന്നതിൽ ഹനേഡയുടെ പ്രതിബദ്ധത ഈ നേട്ടത്തിന് പിന്നിലുണ്ട്. എയർപോർട്ടിലെ എല്ലാ മേഖലകളിലും, പ്രത്യേകിച്ച് യാത്രക്കാർ കൂടുതലായി ഉപയോഗിക്കുന്ന സ്ഥലങ്ങളിൽ, ഏറ്റവും മികച്ച ശുചിത്വം ഉറപ്പാക്കുന്നതിന് അത്യാധുനിക സാങ്കേതികവിദ്യകളും നൂതനമായ പ്രവർത്തനരീതികളും ഇവിടെ ഉപയോഗിക്കുന്നു.
യാത്രക്കാർക്ക് അതിവേഗവും തടസ്സങ്ങളുമില്ലാത്തതുമായ സേവനങ്ങൾ നൽകുന്ന ജപ്പാൻ എയർലൈൻസിന്റെ ഹാലോ (HALO) പ്രോഗ്രാം ഇതിന് ഒരു ഉദാഹരണമാണ്. ചെക്ക്-ഇൻ, ലഗേജ് കൈകാര്യം ചെയ്യൽ തുടങ്ങിയ ഗ്രൗണ്ട് ഹാൻഡ്‌ലിങ് ജോലികൾ ഏകോപിപ്പിക്കാൻ ആർട്ടിഫിഷ്യൽ ഇന്റലിജൻസ് ഉപയോഗിക്കുന്ന ഈ സംവിധാനം എയർപോർട്ടിന്റെ കാര്യക്ഷമത വർദ്ധിപ്പിക്കുന്നു.
മറ്റ് പ്രധാന വിമാനത്താവളങ്ങൾ
ഹനേഡയ്ക്ക് പിന്നാലെ രണ്ടാം സ്ഥാനത്തുള്ളത് സിംഗപ്പൂർ ചാംഗി എയർപോർട്ടാണ്. പതിറ്റാണ്ടുകളായി മികച്ച പ്രവർത്തന മികവിനും അത്യാധുനിക രൂപകൽപ്പനയ്ക്കും പേരുകേട്ട വിമാനത്താവളമാണിത്. യാത്രികരുടെ സൗകര്യങ്ങൾക്കും ശുചിത്വത്തിനും ഇവിടെ ഏറെ പ്രാധാന്യം നൽകുന്നു. പട്ടികയിൽ മൂന്നാമനായ ദോഹ ഹമദ് എയർപോർട്ടാണ് ഏഷ്യയ്ക്ക് പുറത്തുനിന്നുള്ള ഒരേയൊരു വിമാനത്താവളം.
സ്കൈട്രാക്സ് അവാർഡ് ഏതാണ്ട് 500 വിമാനത്താവളങ്ങളിലെ യാത്രാനുഭവങ്ങളെ വിലയിരുത്തിയാണ് തയ്യാറാക്കുന്നത്. യാത്രക്കാരുടെ അഭിപ്രായങ്ങൾ ശേഖരിച്ച്, ഫ്ലോറുകളുടെ വൃത്തി, ശുചീകരിച്ച വിശ്രമമുറികൾ, അണുവിമുക്തമാക്കിയ കൗണ്ടറുകൾ, ക്രമീകരിച്ച ഇരിപ്പിടങ്ങൾ, മാലിന്യനിർമാർജന സംവിധാനങ്ങൾ, റീസൈക്ലിംഗ് സൗകര്യങ്ങൾ എന്നിവയെല്ലാം പരിഗണിച്ചാണ് ഈ റാങ്കിംഗ് തീരുമാനിക്കുന്നത്.
2025-ലെ ഏറ്റവും വൃത്തിയുള്ള മികച്ച 10 വിമാനത്താവളങ്ങൾ:
- ടോക്കിയോ ഹനേഡ എയർപോർട്ട്
- സിംഗപ്പൂർ ചാംഗി എയർപോർട്ട്
- ദോഹ ഹമദ് എയർപോർട്ട്
- സോൾ ഇഞ്ചിയോൺ എയർപോർട്ട്
- ഹോങ്കോങ് എയർപോർട്ട്
- സെൻട്രയർ നഗോയ എയർപോർട്ട്
- ടോക്കിയോ നരിറ്റ എയർപോർട്ട്
- കൻസായ് എയർപോർട്ട്
- തായ്‌വാൻ തായുവാൻ എയർപോർട്ട്
- സൂറിച്ച് എയർപോർട്ട്
ഈ പട്ടികയിൽ ജപ്പാനിൽനിന്നുമാത്രം നാല് വിമാനത്താവളങ്ങളുണ്ട്. ശുചിത്വവും സുരക്ഷയും ഒരുമിച്ചു പരിപാലിക്കുന്നതിൽ ഏഷ്യൻ രാജ്യങ്ങളുടെ മികവാണ് ഈ പട്ടികയിൽ പ്രതിഫലിക്കുന്നത്.
SUMMARY: World’s Cleanest Airports; Nine out of ten are located in Asia
