പ്രായപൂർത്തിയാകാത്ത പെൺകുട്ടിയെ ലൈംഗികമായി പീഡിപ്പിച്ചു; യോഗ പരിശീലകൻ അറസ്റ്റിൽ

ബെംഗളൂരു: പ്രായപൂർത്തിയാകാത്ത പെൺകുട്ടിയെ ലൈംഗികമായി പീഡിപ്പിച്ച കേസിൽ യോഗ പരിശീലകനെ ആർആർ നഗർ പോലീസ് അറസ്റ്റ് ചെയ്തു. രാജരാജേശ്വരി നഗറിലെ സൺഷൈൻ ദി യോഗ സോണിന്റെ സ്ഥാപകനും ഡയറക്ടറുമായ നിരഞ്ജൻ മൂർത്തി (55) ആണ് അറസ്റ്റിലായത്. യോഗ ക്ലാസിൽ പങ്കെടുത്ത 17 കാരിയെ ലൈംഗികമായി പീഡിപ്പിച്ചുവെന്നാണ് ഇയാൾക്കെതിരെയുള്ള കേസ്. പെൺകുട്ടിയുടെ പരാതിയുടെ അടിസ്ഥാനത്തിൽ പോക്സോ നിയമപ്രകാരം കേസെടുത്തു.  

2019-ൽ കർണാടക യോഗാസന സ്‌പോർട്‌സ് അസോസിയേഷന്റെ (കെ‌വൈ‌എസ്‌എ) സെക്രട്ടറിയായി സേവനമനുഷ്ഠിച്ച കാലം മുതൽ നിരഞ്ജൻ മൂർത്തിയെ അറിയാമെന്ന് പെണ്‍കുട്ടി പരാതിയിൽ പറയുന്നു. 2021-ൽ പെണ്‍കുട്ടി യോഗ മത്സരങ്ങളിൽ പങ്കെടുക്കാൻ തുടങ്ങി, 2023-ൽ യോഗാ മത്സരത്തിനായി അദ്ദേഹത്തോടൊപ്പം തായ്‌ലൻഡിലേക്ക് പോയി. പെൺകുട്ടിക്ക് 17 വയസ്സായിരുന്നു പ്രായം. ഈ യാത്രയ്ക്കിടെയാണ് മൂർത്തി തന്നെ ലൈംഗികമായി പീഡിപ്പിച്ചതെന്ന് പരാതിയില്‍ പറയുന്നു. സംഭവത്തെത്തുടർന്ന് പെണ്‍കുട്ടി യോഗ മത്സരങ്ങളിൽ പങ്കെടുക്കുന്നത് നിർത്തി. 2024 ൽ വീണ്ടും മത്സരങ്ങളിൽ പങ്കെടുക്കുന്നതിനായി മൂർത്തി നടത്തുന്ന സൺഷൈൻ ഇൻസ്റ്റിറ്റ്യൂട്ടിൽ അവർ വീണ്ടും ചേർന്നു. 2024 മുതൽ ലൈംഗികമായി പീഡിപ്പിക്കുന്നത് തുടർന്നതായും പരാതിയിൽ ആരോപിക്കുന്നു.

പെൺകുട്ടിയുടെ പരാതിയുടെ അടിസ്ഥാനത്തിൽ, ഭാരതീയ ന്യായ സംഹിത (ബിഎൻഎസ്) സെക്ഷൻ 69 (വഞ്ചനാപരമായ മാർഗങ്ങൾ ഉപയോഗിച്ചുള്ള ലൈംഗിക ബന്ധം), 75(2) (ലൈംഗിക പീഡനം), 2012 ലെ ലൈംഗിക കുറ്റകൃത്യങ്ങളിൽ നിന്ന് കുട്ടികളെ സംരക്ഷിക്കൽ (പോക്സോ) നിയമത്തിലെ സെക്ഷൻ 12 (ലൈംഗിക പീഡനത്തിനുള്ള ശിക്ഷ) എന്നിവ പ്രകാരമാണ് മൂർത്തിക്കെതിരെ കേസ് എടുത്തത്. യോഗാ ക്ലാസില്‍ എത്തുന്ന മറ്റ് പെണ്‍കുട്ടികളില്‍നിന്നും സമാനമായ പരാതികൾ ലഭിച്ചിട്ടുണ്ടോ എന്നതടക്കമുള്ള വിവരങ്ങള്‍ പോലീസ് അന്വേഷിച്ച് വരികയാണ്.
SUMMARY: Yoga instructor arrested for sexually assaulting minor girl