ബെംഗളൂരു: സംസ്ഥാനത്ത് ഏപ്രിൽ രണ്ട് മുതൽ കനത്ത മഴ ലഭിച്ചേക്കുമെന്ന് കാലാവസ്ഥ നിരീക്ഷണ കേന്ദ്രം (ഐഎംഡി) അറിയിച്ചു. വിവിധ ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. ഉത്തര കന്നഡ, ദക്ഷിണ കന്നഡ, ഉഡുപ്പി, ബെളഗാവി, ധാർവാഡ്, ഗദഗ്, ചിക്കമഗളൂരു, ഹാസൻ, കുടക്, മൈസൂരു എന്നിവിടങ്ങളിലാണ് യെല്ലോ അലർട്ട്. ഈ ജില്ലകളിൽ തീവ്രമായ മഴയും ഇടിമിന്നലും ശക്തമായ കാറ്റും ഉണ്ടായേക്കുമെന്ന് ഐഎംഡി അറിയിച്ചു.
കഴിഞ്ഞ ഒരാഴ്ചയായി സംസ്ഥാനത്തിന്റെ വിവിധ ഭാഗങ്ങളിൽ നേരിയ തോതിൽ മഴ പെയ്യുന്നുണ്ട്. വിജയനഗർ, ശിവമൊഗ, തുമകുരു, മാണ്ഡ്യ, കോലാർ, ദാവൻഗെരെ, ചിത്രദുർഗ, ബെംഗളൂരു റൂറൽ, ബെംഗളൂരു അർബൻ, യാദ്ഗിർ, വിജയപുര, റായ്ച്ചൂർ, കോപ്പാൾ, കലബുർഗി, ബിദർ എന്നിവിടങ്ങളിൽ കഴിഞ്ഞ ദിവസങ്ങളിൽ ശക്തമായ കാറ്റും മഴയും ലഭിച്ചിരുന്നു.
മൈസൂരു, കുടക്, ഹാസൻ, ചിക്കമഗളൂരു എന്നിവിടങ്ങളിൽ ഏപ്രിൽ 1, 2 തീയതികളിൽ ആലിപ്പഴവർഷം ഉണ്ടായേക്കുമെന്നും ഐഎംഡി അറിയിച്ചു. അതേസമയം കർണാടകയിലെ എല്ലാ തീരദേശ ജില്ലകളിലും ബെളഗാവി, ധാർവാഡ്, ഗദഗ്, ഹാവേരി എന്നിവിടങ്ങളിൽ ഏപ്രിൽ 2ന് ഇടിമിന്നലോട് കൂടിയ ശക്തമായ മഴയ്ക്കാണ് സാധ്യത.
TAGS: RAIN | KARNATAKA
SUMMARY: Heavy rain predicted in parts of state starting from 2nd
