ബെംഗളൂരു: ബെംഗളൂരുവിലെ വായു മലിനീകരണം പഠിക്കാൻ പ്രത്യേക കമ്മിറ്റി രൂപീകരിച്ചു. ദേശീയ ഹരിത ട്രൈബ്യൂണലാണ് (എൻജിടി) കമ്മിറ്റി രൂപീകരിച്ചത്. അന്തരീക്ഷത്തിലെ നൈട്രജൻ ഡയോക്സൈഡിന്റെ അളവിനെയാണ് കമ്മിറ്റി പഠനവിധേയമാക്കുന്നത്.
മാധ്യമ റിപ്പോർട്ടുകളെത്തുടർന്നാണ് ഹരിത ട്രൈബ്യൂണൽ കമ്മിറ്റി രൂപവത്കരിച്ചത്. ബെംഗളൂരു ഉൾപ്പെടെ ഇന്ത്യയിലെ ഏഴ് പ്രധാന നഗരങ്ങളിലെ വർധിച്ച നൈട്രജൻ ഡയോക്സൈഡിന്റെ അളവും അത് മൂലമുണ്ടാകുന്ന ആരോഗ്യപ്രശ്നങ്ങളെ കുറിച്ചും അടുത്തിടെ നിരവധി റിപ്പോർട്ടുകൾ പുറത്തുവന്നിരുന്നു. ഇത് അടിസ്ഥാനമാക്കിയാണ് ട്രൈബ്യുണൽ നടപടി.
റിപ്പോർട്ട് സമർപ്പിക്കാൻ കമ്മിറ്റിക്ക് രണ്ട് മാസമാണ് ട്രൈബ്യൂണൽ സമയം നൽകിയിരിക്കുന്നത്. നഗരത്തിൽ ബി.ടി.എം ലേഔട്ട്, സിൽക്ക് ബോർഡ് എന്നിവിടങ്ങളിലാണ് ഏറ്റവും കൂടുതൽ അന്തരീക്ഷ മലിനീകരണം റിപ്പോർട്ട് ചെയ്തിട്ടുള്ളത്. നൈട്രജൻ ഓക്സൈഡ് പ്രധാനമായും അന്തരീക്ഷത്തിലെത്തുന്നത് വാഹനങ്ങളിൽ നിന്നാണ് എന്നാണ് പഠനങ്ങൾ വ്യക്തമാക്കുന്നത്.
TAGS: BENGALURU | AIR POLLUTION
SUMMARY: Special committee formed in city by NGT to study air pollution
