കാട്ടുപന്നിക്ക് വേണ്ടി വെച്ച കെണിയിൽ പുള്ളിപ്പുലിയെ ചത്ത നിലയിൽ കണ്ടെത്തി

ബെംഗളൂരു: കാപ്പിത്തോട്ടത്തിൽ കാട്ടുപന്നിക്കായി വെച്ച കെണിയിൽ പുള്ളിപ്പുലിയെ ചത്ത നിലയിൽ കണ്ടെത്തി. ചിക്കമഗളുരു കൊട്ടിഗെഹര-ബാലൂർ മെയിൻ റോഡിലാണ് സംഭവം. ഗ്രാമീണർ കാട്ടുപന്നികളെ പിടിക്കാൻ ഒരുക്കിയ കെണിയിൽ പുള്ളിപ്പുലി കുടുങ്ങിയതാണെന്നാണ് വനം വകുപ്പിന്റെ പ്രാഥമിക നിഗമനം.

കാപ്പിത്തോട്ടത്തിന് സമീപം കാട്ടുപന്നികളുടെ ശല്യം രൂക്ഷമായതിനാൽ ഇവയെ പിടികൂടാൻ പ്രദേശവാസികൾ കെണികൾ സ്ഥാപിക്കുന്നത് പതിവാണ്. വെള്ളിയാഴ്ച രാവിലെയാണ് പുള്ളിപ്പുലിയെ കണ്ടത്. ഇതോടെ നാട്ടുകാർ വനം വകുപ്പിനെ വിവരമറിയിക്കുകയായിരുന്നു. മുദിഗെരെയിൽ നിന്നുള്ള വനംവകുപ്പ് ഉദ്യോഗസ്ഥർ സ്ഥലത്തെത്തി. കൂട്ടിനുള്ളിലുള്ള ചെമ്പ് കമ്പികൊണ്ടുള്ള കെണി കഴുത്തിൽ മുറുകി ചത്തതാകാമെന്ന് ഉദ്യോഗസ്ഥർ പറഞ്ഞു. സംഭവത്തിൽ കാപ്പിത്തോട്ടത്തിന്റെ ഉടമയ്ക്കെതിരേ വനംവകുപ്പ് കേസെടുത്തു.

TAGS: KARNATAKA
SUMMARY: Leopard caught in cage stated for boar