ഡെങ്കിപ്പനി; സ്വകാര്യ ആശുപത്രികളിൽ ചികിത്സ നിരക്ക് സർക്കാർ നിശ്ചയിക്കും

ബെംഗളൂരു: സംസ്ഥാനത്തെ സ്വകാര്യ ആശുപത്രികളിൽ ഡെങ്കിപ്പനി പരിശോധനയ്ക്ക് സർക്കാർ ഏകീകൃത നിരക്ക് നിശ്ചയിക്കുമെന്ന് ആരോഗ്യമന്ത്രി ദിനേശ് ഗുണ്ടു റാവു അറിയിച്ചു. ഡെങ്കിപ്പനി പ്രതിരോധ പ്രവർത്തനങ്ങളുമായി ബന്ധപ്പെട്ട് ബിബിഎംപി, ഗ്രാമവികസന, ആരോഗ്യ വകുപ്പുകളിലെ ഉദ്യോഗസ്ഥരുമായി നടത്തിയ യോഗത്തിന് ശേഷമാണ് അദ്ദേഹം ഇക്കാര്യം അറിയിച്ചത്. സ്വകാര്യ ആശുപത്രികൾ കാണുന്ന എല്ലാ ഡെങ്കിപ്പനി കേസുകളും നിർബന്ധമായും റിപ്പോർട്ട് ചെയ്യണമെന്നും അദ്ദേഹം പറഞ്ഞു.

മുൻവർഷത്തെ അപേക്ഷിച്ച് ഈ വർഷം ഡെങ്കിപ്പനി പരിശോധനയിൽ 42 ശതമാനം വർധനവുണ്ടായി. ഡെങ്കിപ്പനി പോസിറ്റീവ് കേസുകൾ എത്രയും വേഗം കണ്ടെത്തിയാൽ മാത്രമേ ഡെങ്കിപ്പനി മരണങ്ങൾ തടയാനാകൂ. ജനുവരി മുതൽ ജൂൺ അവസാനം വരെ സംസ്ഥാനത്ത് 6,187 ഡെങ്കിപ്പനി കേസുകളും ആറ് മരണങ്ങളും രേഖപ്പെടുത്തിയിട്ടുണ്ട്. മരണനിരക്ക് 0.09 ശതമാനമാണ്.

ബെംഗളൂരു, ചിക്കമഗളൂരു, മൈസൂരു, ഹാവേരി, ശിവമോഗ, ചിത്രദുർഗ, ദക്ഷിണ കന്നഡ ജില്ലകളിലാണ് ഏറ്റവും കൂടുതൽ കേസുകൾ റിപ്പോർട്ട് ചെയ്തിരിക്കുന്നത്. സംസ്ഥാനത്തെ എല്ലാ ആശുപത്രികളിലും ആവശ്യമായ എല്ലാ ചികിത്സാ സൗകര്യങ്ങളും ഒരുക്കിയിട്ടുണ്ടെന്ന് മന്ത്രി പറഞ്ഞു. ഡെങ്കിപ്പനി, ഈഡിസ് കൊതുകുകൾ, ലാർവകൾ എന്നിവയെക്കുറിച്ച് വീടുവീടാന്തരം ബോധവൽക്കരണം നടത്താൻ ബിബിഎംപി ഉദ്യോഗസ്ഥരോടും ആശാ പ്രവർത്തകരോടും ദിനേശ് ഗുണ്ടു റാവു നിർദേശിച്ചു.

TAGS: KARNATAKA | DENGUE FEVER
SUMMARY: Private hospitals to have fixed rates for dengue tests