ദുരഭിമാനക്കൊല; ഹുബ്ബള്ളിയിൽ ഗർഭിണിയെ വെട്ടിക്കൊന്നു, പിതാവ് ഉൾപ്പെടെ മൂന്ന് പേർ അറസ്റ്റിൽ

ബെംഗളൂരു: സംസ്ഥാനത്ത് വീണ്ടും ദുരഭിമാനക്കൊല. ഹുബ്ബള്ളി റൂറൽ താലൂക്കിലെ ഇനാം വീരപൂരിലാണ് ആണ് സംഭവം. ​ഗർഭിണിയെ പിതാവും ബന്ധുക്കളും ചേർന്ന് വെട്ടിക്കൊന്നു. 19 കാരിയായ മാന്യത പാട്ടീൽ ആണ് മരിച്ചത്. ഭർത്താവ് വിവേകാനന്ദയും ഉള്‍പ്പെടെ മൂന്നു പേര്‍ക്ക് വെട്ടേറ്റു. സംഭവത്തിൽ പെൺകുട്ടിയുടെ പിതാവ് ഉൾപ്പെടെ മൂന്ന് പേർ അറസ്റ്റിലായിട്ടുണ്ട്. ദളിത് യുവാവിനെ വിവാഹം കഴിച്ചതിന്റെ പേരിലാണ് ആക്രമണം.

ഇക്കഴിഞ്ഞ മെയില്‍ ആണ് വിവേകാനന്ദ ധോഡമണി എന്ന യുവാവിനെ മാന്യത വിവാഹം ചെയ്തത്. വിവാഹശേഷം മാന്യതയുടെ മാതാപിതാക്കൾ വിവേകാനന്ദ വീട് കത്തിക്കുമെന്നും കൊല്ലുമെന്നും ഭീഷണിപ്പെടുത്തിയിരുന്നു. തുടര്‍ന്നു പോലീസ് ഇരുകുടുംബങ്ങളെയും വിളിച്ചുവരുത്തി അനുരഞ്ജന ചര്‍ച്ചകള്‍ നടത്തിയിരുന്നു.

കഴിഞ്ഞ ദിവസം ഇനാം വീരപൂർ ഗ്രാമത്തിൽ വെച്ചാണ് ഇവര്‍ ആക്രമിക്കപ്പെട്ടത്. ആറ് മാസം ഗർഭിണിയായിരുന്നു മാന്യത. കൃഷിയിടത്തിൽ വിവേകാനന്ദയും മാന്യതയും ബന്ധുക്കള്‍ക്കൊപ്പം ജോലി ചെയ്തുകൊണ്ടിരിക്കവേയായിരുന്നു ആക്രമണം. ഗുരുതര പരുക്കേറ്റ മാന്യതയെ ആശുപത്രിയില്‍ പ്രവേശിപ്പിച്ചെങ്കിലും മരിച്ചു. തടയാന്‍ ശ്രമിച്ച വിവേകാനന്ദനും മാതാവിനും ബന്ധുവിനും പരുക്കേറ്റു. ഇവര്‍ ചികിത്സയിലാണ്. 

കൊലപാതകവുമായി ബന്ധപ്പെട്ട് മാന്യതയുടെ പിതാവ് പ്രകാശ്ഗൗഡ പാട്ടീൽ, ബന്ധുക്കളായ വീരനഗൗഡ പാട്ടീൽ, അരുണഗൗഡ പാട്ടീൽ എന്നിവരെ അറസ്റ്റ് ചെയ്തതായി ഹുബ്ബള്ളി റൂറൽ പോലീസ് പറഞ്ഞു. സംഭവത്തില്‍ കൂടുതൽ അന്വേഷണം നടന്നുവരികയാണ്.

SUMMARY: Honor killing in Karnataka! Pregnant woman hacked to death by father and relatives