ബെംഗളൂരു: ബംഗ്ലാദേശി കുടിയേറ്റക്കാർക്ക് ബെംഗളൂരുവിൽ താമസിക്കാൻ അനധികൃതമായി തിരിച്ചറിയൽ കാർഡുകൾ എടുത്തുനൽകിയ യുവാവ് പിടിയിൽ. ആനേക്കലിനു സമീപം സൂര്യ സിറ്റിയിൽ അർണാബ് മണ്ഡൽ എന്നയാളാണ് പിടിയിലായത്. മണ്ഡൽ കഴിഞ്ഞ 10 വർഷത്തോളമായി വ്യാജ ആധാർ, പാൻ കാർഡ് ഉൾപ്പെടെയുള്ളവ നിർമിച്ചുനൽകിയിരുന്നതായി പോലീസ് പറഞ്ഞു.
അർണാബ് മണ്ഡൽ നഗരത്തിൽ സൈബർ കഫെ നടത്തിവരികയായിരുന്നു. കഴിഞ്ഞ ദിവസം കഫെയിൽ പോലീസ് നടത്തിയ റെയ്ഡിൽ 18 വ്യാജ ആധാർ കാർഡുകളും, വാടക കരാറുകളും കണ്ടെത്തി. പശ്ചിമ ബംഗാളിൽ നിന്നും, ബംഗ്ലാദേശിൽ നിന്നും എത്തുന്നവർക്ക് വേണ്ടിയാണ് അർണബ് രേഖകൾ ഉണ്ടാക്കിയതെന്നും 8,000 മുതൽ 10,000 രൂപ വരെ ഇതിനായി ഈടാക്കിയിരുന്നെന്നും പോലീസ് പറഞ്ഞു.
ഇയാളോടൊപ്പം കുറ്റകൃത്യത്തിൽ ഉൾപ്പെട്ട മറ്റുള്ളവർക്കായി തിരച്ചിൽ ഊർജിതമാക്കിയിട്ടുണ്ട്. ഇയാളിൽ നിന്ന് ആധാർ കാർഡുകൾ വാങ്ങി നഗരത്തിൽ അനധികൃതമായി താമസിക്കുന്നവരെ എത്രയും വേഗം കണ്ടെത്തുമെന്ന് ബെംഗളൂരു റൂറൽ എസ്പി സി.കെ. ബാബ പറഞ്ഞു.
TAGS: BENGALURU | ARREST
SUMMARY: Man arrested for facilitating Aadhaar, PAN cards for illegal Bangladeshi immigrants
