റോഡ് മുറിച്ചുകടക്കവേ ബൈക്കിടിച്ച് വാർത്ത ചാനൽ ജീവനക്കാരൻ മരിച്ചു

ബെംഗളൂരു: റോഡ് മുറിച്ചുകടക്കുന്നതിനിടെ ബൈക്കിടിച്ച് സ്വകാര്യ വാർത്ത ചാനലിലെ ജീവനക്കാരൻ മരിച്ചു. കെംഗേരി ഉപനഗരയിലാണ് സംഭവം. വാർത്താ ചാനലിൽ സെക്യൂരിറ്റി ജീവനക്കാരനായി ജോലി ചെയ്തിരുന്ന ഗദഗ് ജില്ല സ്വദേശി ശിവയോഗി (52) ആണ് മരിച്ചത്. കഴിഞ്ഞ 25 വർഷമായി കെംഗേരി ഉപനഗരയ്ക്ക് സമീപം കൃഷ്ണനഗറിൽ കുടുംബത്തോടൊപ്പം താമസിക്കുകയായിരുന്നു ശിവയോഗി.

അപകടത്തിൽ ശിവയോഗിയുടെ കൈകാലുകൾക്ക് ഗുരുതരമായി പരുക്കേൽക്കുകയും തലയിൽ ആന്തരിക രക്തസ്രാവവും ഉണ്ടായതായി പോലീസ് പറഞ്ഞു. അപകടം നടന്ന ശേഷം മണിക്കൂറുകൾ കഴിഞ്ഞിട്ടും ശിവയോഗിയെ ആരും ആശുപത്രിയിൽ എത്തിച്ചിരുന്നില്ല. മാത്രമല്ല, പോലീസിനെയും ആരും വിവരമറിയിച്ചില്ല. എട്ട് മണിക്കൂറുകൾക്ക് ശേഷമാണ് വിവരമറിഞ്ഞ് പോലീസ് സ്ഥലത്തെത്തിയത്. ഉടൻ തന്നെ ശിവയോഗിയെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

യഥാസമയം വൈദ്യസഹായം ലഭിച്ചിരുന്നെങ്കിൽ ശിവയോഗിക്ക് രക്ഷപ്പെടാമായിരുന്നുവെന്ന് ആശുപത്രി അധികൃതർ വ്യക്തമാക്കി. സംഭവത്തിൽ കെംഗേരി ട്രാഫിക് പോലീസ് കേസെടുത്തു.

TAGS: BENGALURU | ACCIDENT
SUMMARY: Security guard killed in hit-and-run incident in Kengeri