സിദ്ധരാമയ്യയെ അധിക്ഷേപിക്കുന്ന വീഡിയോ റെക്കോർഡ് ചെയ്ത് പ്രചരിപ്പിച്ചു; മൈസൂരു ജയിൽ വാർഡന് സസ്പെൻഷൻ

ബെംഗളൂരു: മുഖ്യമന്ത്രി സിദ്ധരാമയ്യയെ അധിക്ഷേപിക്കുന്ന വീഡിയോ റെക്കോർഡ് ചെയ്ത് സോഷ്യൽ മീഡിയയിൽ പ്രചരിപ്പിച്ച മൈസൂരു സെൻട്രൽ ജയിലിലെ വാർഡന് സസ്പെൻഷൻ. വിമുക്ത ഭടൻ കൂടിയായ എച്ച്.എൻ. മധു കുമാറിനെയാണ് (45) സസ്പെൻഡ്‌ ചെയ്തത്. കഴിഞ്ഞ നാല് വർഷമായി ജയിൽ വകുപ്പിൽ മധു സേവനമനുഷ്ഠിച്ചു വരികയായിരുന്നു.

ഏപ്രിൽ 28ന് ബെളഗാവിയിൽ നടന്ന പൊതു പരിപാടിയിൽ മുതിർന്ന പോലീസ് ഉദ്യോഗസ്ഥനോട്‌ മുഖ്യമന്ത്രി ദേഷ്യപ്പെട്ട സംഭവത്തിന്റെ പശ്ചാത്തലത്തിലാണ് മധു വീഡിയോ ചിത്രീകരിച്ചത്. സംഭവത്തെ അപലപിച്ച് വീഡിയോ ചിത്രീകരിച്ച ശേഷം ഇത് സമൂഹമാധ്യമങ്ങളിൽ പോസ്റ്റ്‌ ചെയ്യുകയായിരുന്നുവെന്ന് മൈസൂരു സെൻട്രൽ ജയിൽ സൂപ്രണ്ട് ബി.എസ്. രമേശ് പറഞ്ഞു. വീഡിയോയിൽ നിരവധി പൊതുവിഷയവുമായി ബന്ധപ്പെട്ട് മധു മുഖ്യമന്ത്രിയെ വിമർശിച്ചിരുന്നു.

മൈസൂരു അർബൻ ഡെവലപ്പ്മെന്റ് അതോറിറ്റിയുടെ (മുഡ) ഭൂമി അഴിമതി കേസും വീഡിയോയിൽ പരാമർശിക്കുന്നുണ്ട്. സംഭവത്തിൽ ആഭ്യന്തര അന്വേഷണം നടത്തിയതായും മധു കുറ്റം ചെയ്തതായി കണ്ടെത്തിയതോടെയാണ് വകുപ്പുതല നടപടി എടുത്തതെന്നും ജയിൽ സൂപ്രണ്ട് വ്യക്തമാക്കി.

TAGS: KARNATAKA | SUSPENDED
SUMMARY: Mysuru Central Prison warder suspended over abusive video against CM Siddaramaiah