കോഴിക്കോട്: മാസപ്പിറവി ദൃശ്യമാകാത്തതിനാൽ കേരളത്തിൽ റമദാൻ വ്രതാരംഭം വ്യാഴാഴ്ച. ശഅ്ബാൻ 30 ബുധനാഴ്ച പൂർത്തിയാക്കി വ്യാഴാഴ്ച റമദാൻ ഒന്നായിരിക്കുമെന്ന് പാണക്കാട് സാദിഖലി ശിഹാബ് തങ്ങൾ ഉൾപ്പെടെയുള്ളവർ അറിയിച്ചു.
ചൊവ്വാഴ്ച വൈകുന്നേരം സംസ്ഥാനത്തിന്റെ വിവിധ ഭാഗങ്ങളിൽ മാസപ്പിറവി നിരീക്ഷിച്ചെങ്കിലും എവിടെയും ദൃശ്യമായതായി റിപ്പോർട്ടുകളില്ല. ഹിജ്‌റ വർഷം 1447-ലെ റമദാൻ മാസത്തിന് വ്യാഴാഴ്ച പുലർച്ചെ തുടക്കമാകും. ഇതോടെ വിശ്വാസികൾ ഇനി ഒരു മാസം നീണ്ടുനിൽക്കുന്ന വ്രതശുദ്ധിയുടെ നാളുകളിലേക്ക് കടക്കും.
പാണക്കാട് സാദിഖലി ശിഹാബ് തങ്ങൾ, സമസ്ത കേരള ജംഇയ്യത്തുൽ ഉലമ പ്രസിഡന്റ് മുഹമ്മദ് ജിഫ്രി മുത്തുക്കോയ തങ്ങൾ, കോഴിക്കോട് ഖാദി മുഹമ്മദ് കോയ തങ്ങൾ ജമലുല്ലൈലി തുടങ്ങിയവർ വ്രതാരംഭം സംബന്ധിച്ച ഔദ്യോഗിക പ്രഖ്യാപനം നടത്തി.
ഗൾഫ് നാടുകളിൽ മാസപ്പിറവി നിരീക്ഷിച്ചതിന്‍റെ അടിസ്ഥാനത്തിൽ ബുധനാഴ്ച വ്രതം ആരംഭിക്കാനിരിക്കെയാണ് കേരളത്തിൽ വ്യാഴാഴ്ച മുതൽ നോമ്പ് തുടങ്ങുന്നത്.
SUMMARY: Ramadan fast begins in Kerala on Thursday; no sign of the crescent moon
