ന്യൂഡല്ഹി: പാചക വാതക വിതരണത്തിന്റെ കാര്യത്തിൽ പരിഭ്രാന്തിയുടെ ആവശ്യമില്ലെന്നും തെറ്റായ കാര്യങ്ങള് പ്രചരിപ്പിക്കരുതെന്നും കേന്ദ്രം. ഗാര്ഹിക ആവശ്യത്തിനുള്ള എൽപിജി ആവശ്യത്തിന് സ്റ്റോക്കുണ്ടെന്നും അനാവശ്യമായി പാനിക് ബുക്കിങ് നടത്തരുതെന്നും കേന്ദ്ര പെട്രോളിയം മന്ത്രാലയം അറിയിച്ചു. എൽപിജി ക്ഷാമം ഉണ്ടെന്ന നിലയിൽ തെറ്റായകാര്യങ്ങള് പ്രചരിപ്പിക്കരുതെന്ന് കേന്ദ്ര വാര്ത്താവിതരണ മന്ത്രാലയവും വാര്ത്താസമ്മേളനത്തിൽ പറഞ്ഞു.
വലിയ പ്രതിസന്ധി ഒഴിവാക്കാനാണ് ചെറിയ നിയന്ത്രണങ്ങള് ബുക്കിങിൽ വരുത്തിയത്. ഗ്രാമീണ മേഖലയിൽ ഗ്യാസ് സിലിണ്ടര് ബുക്ക് ചെയ്യുന്നതിനുള്ള ഇടവേള 45 ദിവസമാക്കിയിട്ടുണ്ടെന്നും കേന്ദ്രം അറിയിച്ചു. 50 ലക്ഷം സിലിണ്ടറുകൾ ദിവസേന വിതരണം ചെയ്യുന്നുണ്ട്. പരിഭ്രാന്തി പരത്തുന്ന വാര്ത്തകള് പ്രചരിപ്പിക്കരുതെന്നും കേന്ദ്രം അഭ്യര്ത്ഥിച്ചു. നഗരപ്രദേശങ്ങളിൽ ഇപ്പോള് 25 ദിവസത്തെ ഇടവേളയ്ക്ക് ശേഷമാണ് ബുക്കിംഗ് അനുവദിക്കുന്നത്.
പശ്ചിമേഷ്യയിലെ സംഘർഷം മൂലം ഇറക്കുമതി തടസപ്പെട്ടതും വിതരണ ശൃംഖലയിലുണ്ടായ കുറവുമാണ് ഇത്തരമൊരു കടുത്ത തീരുമാനമെടുക്കാൻ സർക്കാരിനെ പ്രേരിപ്പിച്ചത്. പാചകവാതക ക്ഷാമം മുതലെടുത്ത് വ്യാവസായിക ആവശ്യത്തിനുള്ള സിലിണ്ടറുകൾ അമിതവിലയ്ക്ക് വിൽക്കുന്നവർക്കെതിരെ കർശന നടപടി സ്വീകരിക്കുമെന്ന് കേന്ദ്രം മുന്നറിയിപ്പ് നൽകി. പാചകവാതകത്തിന് നിയന്ത്രണമുണ്ടെങ്കിലും രാജ്യത്ത് പെട്രോൾ, ഡീസൽ എന്നിവയുടെ വിതരണത്തിൽ തടസമില്ലെന്നും ആവശ്യമായ ശേഖരം ഉണ്ടെന്നും ഇന്ത്യൻ ഓയിൽ കോർപ്പറേഷൻ അറിയിച്ചു.
SUMMARY: Domestic LPG booking window extended to 45 days in rural areas
