ചെന്നൈ: വിദ്യാലയങ്ങള്‍ക്കും ആരാധനാലയങ്ങള്‍ക്കും സമീപം പ്രവർത്തിക്കുന്ന സർക്കാർ മദ്യശാലകള്‍ (ടാസ്മാക്) അടിയന്തരമായി പൂട്ടാൻ മുഖ്യമന്ത്രി സി.ജോസഫ് വിജയ് ഉത്തരവിട്ടു. വിദ്യാലയങ്ങള്‍ക്കും ആരാധനാലയങ്ങള്‍ക്കും സമീപം 500 മീറ്റർ ചുറ്റളവില്‍ പ്രവർത്തിക്കുന്ന 717 ഷോപ്പുകളാണ് ആദ്യഘട്ടത്തില്‍ പൂട്ടുന്നത്.
രണ്ടാഴ്ചയ്ക്കകം ഈ ഉത്തരവ് നടപ്പിലാക്കണമെന്ന് അധികൃതർക്ക് കർശന നിർദേശം നല്‍കി. രണ്ടാഴ്ചയ്ക്കുള്ളില്‍ ഈ 717 ഷോപ്പുകളുടെയും പ്രവർത്തനം അവസാനിപ്പിക്കണമെന്നും ഇതിന്റെ പുരോഗതി കൃത്യമായി വിലയിരുത്തണമെന്നും മുഖ്യമന്ത്രി ഉന്നത ഉദ്യോഗസ്ഥരോട് ആവശ്യപ്പെട്ടിട്ടുണ്ട്. മുഖ്യമന്ത്രിയായി ചുമതലയേറ്റ ശേഷമുള്ള വിജയ്‌യുടെ സുപ്രധാന തീരുമാനങ്ങളില്‍ ഒന്നാണിത്.
സംസ്ഥാനത്തെ പൊതുസ്ഥലങ്ങളിലും സെൻസിറ്റീവ് മേഖലകളിലും മദ്യശാലകള്‍ പ്രവർത്തിക്കുന്നത് സംബന്ധിച്ച പൊതുജനങ്ങളുടെ പരാതികള്‍ പരിഗണിച്ചാണ് ഈ സുപ്രധാന തീരുമാനം. മുഖ്യമന്ത്രിയുടെ നിർദേശപ്രകാരം സംസ്ഥാനവ്യാപകമായി നടത്തിയ പരിശോധനയിലാണ് മാനദണ്ഡങ്ങള്‍ ലംഘിച്ച്‌ പ്രവർത്തിക്കുന്ന ഷോപ്പുകള്‍ കണ്ടെത്തിയത്.
SUMMARY: Order to close 717 TASMAC liquor shops in Tamil Nadu
