തിരുവനന്തപുരം: നിയമസഭാ തിരഞ്ഞെടുപ്പിലെ അവിസ്മരണീയ വിജയത്തിനു ശേഷം വി.ഡി. സതീശന് നേതൃത്വം നല്കുന്ന യുഡിഎഫ് 21 അംഗ മന്ത്രിസഭ ഇന്നുരാവിലെ 10ന് സെൻട്രൽ സ്റ്റേഡിയത്തിൽ സത്യപ്രതിജ്ഞ ചെയ്ത് അധികാരമേൽക്കും. സെക്രട്ടേറിയറ്റിനുപിന്നിലുള്ള സെൻട്രൽ സ്റ്റേഡിയത്തിലെ കൂറ്റൻവേദിയിൽ ഗവർണർ രാജേന്ദ്ര വിശ്വനാഥ ആർലേക്കർ സത്യവാചകം ചൊല്ലിക്കൊടുക്കും.
സത്യപ്രതിജ്ഞയ്ക്കുശേഷം മുഖ്യമന്ത്രിയും മന്ത്രിമാരും ലോക്ഭവനിൽ ഗവർണറുടെ വിരുന്നിൽ പങ്കെടുക്കും. തുടർന്ന് സെക്രട്ടറിയറ്റിൽ മന്ത്രിസഭയുടെ ആദ്യ യോഗം ചേരും. സത്യപ്രതിജ്ഞാ ചടങ്ങിൽ ലോക്സഭാ പ്രതിപക്ഷ നേതാവ് രാഹുൽ ഗാന്ധി, കോൺഗ്രസ് പ്രസിഡന്റ് മല്ലികാർജുൻ ഖാർഗെ, എഐസിസി ജനറൽ സെക്രട്ടറി പ്രിയങ്ക ഗാന്ധി എംപി, കർണാടക മുഖ്യമന്ത്രി സിദ്ധരാമയ്യ, ഉപമുഖ്യമന്ത്രി ഡി കെ ശിവകുമാർ, തെലങ്കാന മുഖ്യമന്ത്രി രേവന്ത് റെഡ്ഡി, ഹിമാചൽപ്രദേശ് മുഖ്യമന്ത്രി സുഖ്വിന്ദർ സിങ് സുഖു, സിപിഐ എം പൊളിറ്റ് ബ്യൂറോ അംഗം പിണറായി വിജയൻ, വിവിധ കക്ഷിനേതാക്കൾ തുടങ്ങിയവർ പങ്കെടുക്കും.
മുഖ്യമന്ത്രിയടക്കമുള്ള 21 മന്ത്രിമാരുടെയും പട്ടിക ഞായറാഴ്ച വൈകീട്ട് അഞ്ചുമണിക്ക് ലോക്ഭവനിലെത്തി വി.ഡി. സതീശൻ കൈമാറി. ഘടകകക്ഷികളുമായുള്ള നീണ്ട ചർച്ചകൾക്കും ഗ്രൂപ്പ് സമവാക്യങ്ങൾക്കും ഒടുവിലാണ് കൃത്യമായ പ്രാതിനിധ്യം ഉറപ്പാക്കിക്കൊണ്ടുള്ള പട്ടിക തയ്യാറാക്കിയത്. കോൺഗ്രസ്, മുസ്ലിംലീഗ്, കേരള കോൺഗ്രസ്, ആർഎസ്പി, സിഎംപി, കേരള കോൺഗ്രസ് ജേക്കബ്, കെഡിപി എന്നീ കക്ഷികൾക്കെല്ലാം മന്ത്രിസഭയിൽ പ്രാതിനിധ്യമുണ്ട്.
മുഖ്യമന്ത്രി ഉൾപ്പെടെ14 പേർ പുതുമുഖങ്ങളാണ്. പട്ടികജാതി വിഭാഗത്തിൽ നിന്നു രണ്ട് പേരുണ്ട്. മുഖ്യമന്ത്രിക്ക് പുറമെ പതിനൊന്നു പേരാണ് കോൺഗ്രസിൽ നിന്നുള്ളത്. ഒമ്പത് അംഗങ്ങളുള്ള ഈഴവ സമുദായത്തിന് ലഭിച്ചത് മൂന്ന് മന്ത്രി സ്ഥാനങ്ങൾ മാത്രം. മുതിർന്ന നേതാവ് തിരുവഞ്ചൂർ രാധാകൃഷ്ണനാണ് സ്പീക്കർ. ഷാനിമോൾ ഉസ്മാൻ ഡെപ്യൂട്ടി സ്പീക്കർ. രണ്ടാം കേരള നിയമസഭയിൽ എ.നഫീസത്ത് ബീവി ഡെപ്യൂട്ടി സ്പീക്കർ പദവി വഹിച്ച ശേഷം ആദ്യമായാണ് ഒരു വനിത ഈ പദവിയിൽ വരുന്നത്.
മന്ത്രിമാരും സാധ്യതാ വകുപ്പും
വി.ഡി. സതീശൻ (മുഖ്യമന്ത്രി) - ധനം, തുറമുഖം, നിയമം, പൊതുഭരണം
രമേശ് ചെന്നിത്തല - ആഭ്യന്തരം, വിജിലൻസ്
പി.കെ കുഞ്ഞാലിക്കുട്ടി - വ്യവസായം, ഐ.ടി, ഹജ്ജ്, വഖഫ്
സി.പി. ജോൺ - ഗതാഗതം
മോൻസ് ജോസഫ് - ജലവിഭവം
കെ. മുരളീധരൻ - വൈദ്യുതി
സണ്ണി ജോസഫ് - റവന്യു
ഷിബു ബേബി ജോൺ - തൊഴിൽ
അനൂപ് ജേക്കബ് - ഭക്ഷ്യം
എ.പി. അനിൽകുമാർ - ആരോഗ്യം
പി.സി. വിഷ്ണുനാഥ് - ടൂറിസം, സാംസ്കാരികം
എം. ലിജു - എക്സൈസ്
പി.കെ. ബഷീർ - പൊതുമരാമത്ത്
എൻ. ഷംസുദ്ദീൻ - വിദ്യാഭ്യാസം
കെ.എം. ഷാജി - തദ്ദേശ സ്വയംഭരണം
ടി. സിദ്ദിഖ് - വനം
ബിന്ദു കൃഷ്ണ - വനിത, ശിശുക്ഷേമ വകുപ്പ്
ഒ.ജെ. ജനീഷ് - യുവജനക്ഷേമം
റോജി എം. ജോൺ - (വകുപ്പ് തീരുമാനമായില്ല)
കെ.എ. തുളസി - എസ്.സി, എസ്.ടി വകുപ്പ്
വി.ഇ. അബ്ദുൽ ഗഫൂർ - ഫിഷറീസ്
SUMMARY: ‘Team V.D. Satheesan’; Chief Minister and 20 ministers to take office today
