തിരുവനന്തപുരം: നീണ്ട വേനലവധിക്കുശേഷം സംസ്ഥാനത്തെ സ്കൂളുകൾ തിങ്കളാഴ്ച തുറക്കും. സ്‌കൂൾ പ്രവേശനോത്സവത്തിന്റെ സംസ്ഥാനതല ഉദ്‌ഘാടനം തിരുവനന്തപുരം പട്ടം ഗവ. മോഡൽ ഗേൾസ് ഹയർ സെക്കൻഡറി സ്‌കൂളിൽ ജൂൺ ഒന്നിന് മുഖ്യമന്ത്രി വി.ഡി. സതീശൻ നിർവഹിക്കും. രാവിലെ 10ന് നടക്കുന്ന സമ്മേളനത്തിൽ വിദ്യാഭ്യാസ മന്ത്രി എൻ.ഷംസുദ്ദീൻ അദ്ധ്യക്ഷനാകും.
എല്ലാ വിദ്യാലയങ്ങളിലും ജില്ലാ, ബ്ലോക്ക്‌ തലങ്ങളിലും പ്രവേശനോത്സവം നടക്കും. നീണ്ട പ്രസംഗങ്ങൾക്കുപകരം കുട്ടികളുമായി സംവദിക്കുന്ന പരിപാടികൾ സംഘടിപ്പിക്കാനാണ് സർക്കാർ നിർദേശം. വിദ്യാർഥികളും രക്ഷിതാക്കളും അധ്യാപകരും ചേർന്ന് സൈബർസുരക്ഷാ പ്രതിജ്ഞയുമെടുക്കും. ഒന്നു മുതൽ 12 വരെ ക്ലാസുകളിലായി 42 ലക്ഷത്തോളം കുട്ടികളാണ് നാളെ മുതൽ സ്കൂളുകളിലേക്കു പോകുന്നത്.
അതേസമയം ശക്തമായ മഴയ്ക്ക് സാധ്യതയുള്ളതിനാൽ രക്ഷിതാക്കൾ ആശങ്കയിലാണ്. കനത്ത മഴ കണക്കിലെടുത്ത് പ്രവേശനോത്സവം മുൻ വർഷങ്ങളിൽ സർക്കാർ മാറ്റി വച്ചിട്ടുണ്ട്. ശക്തമായ ഇടിമിന്നലോടു കൂടിയ മഴയാണ് ഇന്നലെ വിവിധ പ്രദേശങ്ങളിലുണ്ടായത്.
SUMMARY: Schools to open tomorrow; State-level entrance ceremony inaugurated at Pattom Girls
