ബെംഗളൂരു: കേരളത്തിലേക്കുള്ള യാത്ര പ്രശ്നവുമായി ബന്ധപ്പെട്ട്
കര്ണാടക പ്രവാസി കോണ്ഗ്രസ് ഭാരവാഹികള് ബെംഗളൂരുവില് കേരള മുഖ്യമന്ത്രി വി.ഡി.സതീശനുമായി ചര്ച്ച നടത്തി. ഡി.കെ. ശിവകുമാറിന്റെ സത്യപ്രതിജ്ഞ ചടങ്ങിന് എത്തിയതായിരുന്നു വി.ഡി.സതീശന്.
രാത്രി യാത്രാ നിരോധനം ഏര്പ്പെടുത്തിയ ബന്ദിപ്പൂര് വനപാതയിലൂടെ കൂടുതല് ആര്ടിസി ബസുകള്ക്ക് യാത്രാ പാസ് അനുവദിക്കുക, ശബരിമല തീര്ത്ഥാടന കാലത്ത് കര്ണാടകയില് നിന്നും കൂടുതല് കേരള ആര്ടിസി സര്വീസുകള്, ബെംഗളൂരു-തിരുവനന്തപുരം റൂട്ടില് പ്രഖ്യാപിച്ച വന്ദേഭാരത് സ്ലീപ്പര് സര്വീസ് ഉടന് ആരംഭിക്കുക, വാരാന്ത്യങ്ങളില് എറണാകുളം, തിരുവനന്തപുരം എന്നിവിടങ്ങളിലേക്കും പാലക്കാട് വഴി കണ്ണൂരിലേക്കും സ്പെഷല് ട്രെയിനുകള് അനുവദിക്കുക, കൂടുതല് സ്പെഷല് ബസുകള് അനുവദിക്കുക, ബെംഗളൂരു-എറണാകുളം വന്ദേഭാരത് എക്സ്പ്രസിലെ കോച്ചുകള് 16 ആക്കി ഉയര്ത്തുക തുടങ്ങിയ ആവശ്യങ്ങള് ഉന്നയിച്ച് മുഖ്യമന്ത്രിക്ക് നിവേദനം നല്കി.
നിവേദനത്തില് ഉന്നയിച്ച വിഷയങ്ങള് ഇരുസംസ്ഥാനങ്ങളും ചേര്ന്ന് ചര്ച്ച ചെയ്ത് പരിഹരിക്കുമെന്നും ഇതിന്റെ മുന്നോടിയായി മലയാളി കൂട്ടായ്മകളുടെ യോഗം വിളിക്കുമെന്നും വി.ഡി. സതീശന് അറിയിച്ചതായി ഭാരവാഹികള് പറഞ്ഞു.
പ്രവാസി കോണ്ഗ്രസ് പ്രസിഡന്റ് അഡ്വ.സത്യന് പുത്തൂര്, അഡ്മിനിസ്ട്രേറ്റീവ് ജനറല് സെക്രട്ടറി വിനു തോമസ്, ഡോ.ബി.കെ.നകുല്, ടോംസ് മാത്യു, ജെയ്സണ് ലൂക്കോസ്, വി.ടി.തോമസ്, അലക്സ് ജോസഫ്, മെറ്റി കെ.ഗ്രേസ്, ജോഷി കെ.ജോസഫ്, കെ.മനീഷ് എന്നിവര് പങ്കെടുത്തു.
SUMMARY: Travel issue to Kerala; Karnataka Pravasi Congress held discussions with Chief Minister VD Satheesan
