തിരുവനന്തപുരം: സംസ്ഥാനത്ത് സ്വകാര്യ ബസുകളിലെ വിദ്യാർഥി കണ്സെഷൻ പ്രായപരിധി 27 വയസ്സായി ഉയർത്തി മോട്ടോർ വാഹന വകുപ്പ് (എം.വി.ഡി). നേരത്തെ 24 വയസ്സായിരുന്നു പ്രായപരിധി. പ്രായപരിധി വർദ്ധിപ്പിച്ചതിനൊപ്പം വിദ്യാർത്ഥികളുടെ യാത്രാദൂര പരിധി 40 കിലോമീറ്ററായും പുനർനിശ്ചയിച്ചു. ബസ് ജീവനക്കാരും വിദ്യാർഥികളും തമ്മില് കണ്സെഷനെ ചൊല്ലി പതിവായി ഉണ്ടാകുന്ന തർക്കങ്ങള് പരിഹരിക്കുന്നതിന്റെ ഭാഗമായാണ് പുതിയ ഉത്തരവ്.
രാവിലെ 6 മണി മുതല് വൈകിട്ട് 7 മണി വരെ വിദ്യാർഥികള്ക്ക് കണ്സെഷൻ നിരക്കില് യാത്ര ചെയ്യാം. സർക്കാർ അംഗീകൃത വിദ്യാഭ്യാസ സ്ഥാപനങ്ങളിലെ മുഴുവൻ സമയ വിദ്യാർഥികള്ക്ക് മാത്രമായിരിക്കും ഈ ആനുകൂല്യം. പാർട്ട് ടൈം വിദ്യാർഥികള്ക്കും ക്രാഷ് കോഴ്സ് ചെയ്യുന്നവർക്കും ഇതിന് അർഹതയുണ്ടായിരിക്കില്ല.
കണ്സെഷൻ വിതരണത്തില് സുതാര്യത ഉറപ്പാക്കാൻ അപേക്ഷാ നടപടികള് പൂർണ്ണമായും ഓണ്ലൈനിലേക്ക് മാറുന്നു. ‘MVD leads’ എന്ന മൊബൈല് ആപ്പ് വഴിയായിരിക്കും ഇനി അപേക്ഷകള് സ്വീകരിക്കുക. ആദ്യം വിദ്യാഭ്യാസ സ്ഥാപനങ്ങള് ‘MVD leads’ ആപ്പില് രജിസ്റ്റർ ചെയ്യണം. എം.വി.ഡി പരിശോധനയ്ക്ക് ശേഷം അപ്രൂവല് നല്കിയാല് മാത്രമേ വിദ്യാർഥികൾക്ക് ആപ്പ് വഴി അപേക്ഷിക്കാൻ സാധിക്കൂ.
അപേക്ഷകൻ ആ സ്ഥാപനത്തിലെ വിദ്യാർഥി തന്നെയാണെന്ന് മോട്ടോർ വാഹന വകുപ്പ് കൃത്യമായി ഉറപ്പുവരുത്തിയ ശേഷം മാത്രമേ കണ്സെഷൻ അനുവദിക്കുകയുള്ളൂ. ഈ നടപടികളിലൂടെ കണ്സെഷൻ തട്ടിപ്പുകള് തടയാനും തർക്കങ്ങള് ഒഴിവാക്കാനുമാണ് മോട്ടോർ വാഹന വകുപ്പ് ലക്ഷ്യമിടുന്നത്.
SUMMARY: MVD raises student bus concession age limit to 27
