ദുബൈ: പ്രശസ്ത ഗായകനും കലാകാരനുമായ നിസാർ വയനാട് ദുബൈയിൽ അന്തരിച്ചു. വയനാട് കമ്പളക്കാട് സ്വദേശിയാണ്. ജൂനിയർ ഉദിത് നാരായണൻ എന്നറിയപ്പെട്ടിരുന്നു നിസാർ, നിരവധി പ്രവാസി വേദികളിലും സോഷ്യൽ മീഡിയയിലും നാടൻപാട്ടുകളിലൂടെയും മാപ്പിളപ്പാട്ടുകളിലൂടെയും ഏറേ ജനശ്രദ്ധയും സ്വീകാര്യതയും നേടിയ ഗായകനാണ്.
“ഒന്നിങ്ങു നോക്കാതെ”, “കിളിയേ”, “എന്റെ സ്വന്തമല്ല” തുടങ്ങിയ മാപ്പിളപ്പാട്ടുകൾ അദ്ദേഹത്തിന്റെ ആൽബം ഗാനങ്ങളിൽ ഉൾപ്പെടുന്നു. 2009-ൽ പുറത്തിറങ്ങിയ പാട്ടുകാരൻ, ഓ എന്റെ സുന്ദരി എന്നീ മാപ്പിളപ്പാട്ട് ആൽബങ്ങളിൽ അദ്ദേഹത്തിന്റെ ഗാനങ്ങൾ രേഖപ്പെടുത്തിയിട്ടുണ്ട്. ‘പ്രഫസർ ഡിങ്കൻ’ എന്ന മലയാള സിനിമയിലും, കന്നട സിനിമയിലും പിന്നണി ഗായകനായി ഗാനമാലപിച്ചു.
സ്റ്റേജ് പരിപാടികളുടെ ഭാഗമായി ഏതാനും ദിവസങ്ങളായി ദുബൈയിലായിരുന്നു. പനിയെ തുടർന്നാണ് ആശുപത്രിയിൽ ചികിത്സ തേടിയത്. ശനിയാഴ്ച വൈകീട്ട് ദുബൈ മൻഖൂർ ആശുപത്രിയിലായിരുന്നു മരണം. അടുത്തദിവസം സൗദിയിലും ദുബൈയിലും വിവിധ സംഗീതപരിപാടിയിൽ പങ്കെടുക്കാനിരിക്കെയാണ് മരണം. നിലവിൽ ദുബൈ ദേര മങ്കൂൽ ആസ്റ്റർ ഹോസ്പിറ്റലിലാണ് മൃതദേഹം സൂക്ഷിച്ചിരിക്കുന്നത്.
കമ്പളക്കാട് ഇറോത്ത് വീട്ടിൽ ഇബ്രായിയുടെയും സൈനബയുടേയും മകനാണ്. ഭാര്യ: ഷഹന നിസാർ.
SUMMARY: Singer Nisar Wayanad passes away in Dubai
