ബെംഗളൂരു: ദക്ഷിണ ബെംഗളൂരുവിലെ പ്രധാന ഗതാഗത ഇടനാഴിയായ ബന്നേർഘട്ട മെയിൻ റോഡിലെ ഗതാഗതക്കുരുക്ക് കുറയ്ക്കുന്നതിനും കാൽനടയാത്രക്കാർക്ക് സുരക്ഷിതമായ സഞ്ചാരസൗകര്യം ഒരുക്കുന്നതിനുമായി ജങ്ഷനുകൾ വികസിപ്പിക്കാൻ പദ്ധതി തയ്യാറാക്കുന്നു. ഗൊട്ടിഗെരെ മുതൽ താവരെകെരെ വരെയുള്ള റോഡിലെ ജങ്ഷനുകൾ മെച്ചപ്പെടുത്തുന്നതിനായി വിശദമായ പദ്ധതിരേഖ (ഡിപിആർ) തയ്യാറാക്കി സമർപ്പിക്കാൻ ഗ്രേറ്റർ ബെംഗളൂരു അതോറിറ്റി ചീഫ് കമ്മീഷണർ എം. മഹേശ്വർ റാവു ഉദ്യോഗസ്ഥർക്ക് നിർദേശം നൽകി. ഒക്ടോബർ 13-ന് നടത്തിയ പരിശോധനയ്ക്കു പിന്നാലെയാണ് നടപടി.
കലേന അഗ്രഹാര മെട്രോ സ്റ്റേഷൻ മുതൽ ഐ.ഐ.എം. ബെംഗളൂരു മെട്രോ സ്റ്റേഷൻ വരെയുള്ള ഏകദേശം 3.2 കിലോമീറ്റർ ഭാഗത്തെ നടപ്പാതകളാണ് ചീഫ് കമ്മീഷണറും ഉദ്യോഗസ്ഥരും പരിശോധിച്ചത്. ഈ ഭാഗത്ത് കാൽനടയാത്രക്കാർക്ക് തടസ്സമില്ലാതെ സഞ്ചരിക്കാൻ കഴിയാത്ത നിരവധി സ്ഥലങ്ങൾ ശ്രദ്ധയിൽപ്പെട്ടു. റോഡരികിലെ നടപ്പാതകളുടെ തുടർച്ച ഉറപ്പാക്കുക, തടസ്സങ്ങൾ നീക്കുക, സുരക്ഷിതമായി റോഡ് മുറിച്ചുകടക്കാനുള്ള സൗകര്യങ്ങൾ ഒരുക്കുക എന്നിവയ്ക്ക് മുൻഗണന നൽകണമെന്ന് അദ്ദേഹം നിർദേശിച്ചു.
കലേന അഗ്രഹാര മെട്രോ സ്റ്റേഷനിൽനിന്ന് ഏകദേശം 50 മീറ്റർ അകലെയുള്ള ബസ് സ്റ്റോപ്പിൽനിന്ന് സുരക്ഷിതമായി നടപ്പാതയിലെത്താനുള്ള സൗകര്യമില്ലാത്തതും പരിശോധനയിൽ കണ്ടെത്തി. ഇവിടെ കാൽനടയാത്രക്കാർക്ക് സുരക്ഷിതമായ പാത ഒരുക്കുന്നതിനും റോഡ് മുറിച്ചുകടക്കാനുള്ള സൗകര്യം സൃഷ്ടിക്കാനാകുമോയെന്ന് പരിശോധിക്കുന്നതിനും ഉദ്യോഗസ്ഥരോട് ആവശ്യപ്പെട്ടു. റോഡിന്റെ ഏകദേശം 10.5 മീറ്റർ വീതിയുള്ള വാഹനസഞ്ചാര ഭാഗം പരിഗണിച്ചായിരിക്കും ആവശ്യമായ ക്രമീകരണങ്ങൾ വിലയിരുത്തുക.
നടപ്പാതകളിൽ ഒപ്റ്റിക്കൽ ഫൈബർ കേബിളുകളും അവയുടെ കേബിൾ ചേംബറുകളും തടസ്സം സൃഷ്ടിക്കുന്നതായി കണ്ടെത്തിയിട്ടുണ്ട്. ഇവ മാറ്റിസ്ഥാപിക്കുന്നതിന് ബന്ധപ്പെട്ട ടെലികോം സേവനദാതാക്കളുമായി ഏകോപനം നടത്താൻ നിർദേശം നൽകി. നടപ്പാതകളിൽ സ്ഥാപിച്ചിട്ടുള്ള ട്രാഫിക് പോലീസ് ക്യാബിനുകൾക്ക് അനുയോജ്യമായ മറ്റിടങ്ങൾ കണ്ടെത്താനും വൈദ്യുതി വിതരണ സ്ഥാപനമായ ബെസ്കോമിന്റെ റിങ് മെയിൻ യൂണിറ്റുകൾ സമീപത്തെ സ്വകാര്യ സ്ഥലങ്ങളിലേക്ക് മാറ്റാൻ കഴിയുമോയെന്ന് പരിശോധിക്കാനും ഉദ്യോഗസ്ഥരെ ചുമതലപ്പെടുത്തി.
മെട്രോ സ്റ്റേഷനുകൾ, ബസ് സ്റ്റോപ്പുകൾ, വ്യാപാരസ്ഥാപനങ്ങൾ, താമസമേഖലകൾ എന്നിവയുമായി ബന്ധപ്പെടുന്ന ന്നേർഘട്ട റോഡിൽ വാഹനങ്ങളുടെയും കാൽനടയാത്രക്കാരുടെയും തിരക്ക് ഒരേസമയം അനുഭവപ്പെടുന്ന പ്രദേശമാണ്.
SUMMARY: Bannerghatta Road junctions to be expanded; directive issued to prepare DPR.
