ന്യൂഡല്‍ഹി: എസ്‌ഐആറുമായി ബന്ധപ്പെട്ട് തിരഞ്ഞെടുപ്പ് കമ്മീഷന്‍ എടുത്ത വിവാദ തീരുമാനങ്ങളെ ചോദ്യം ചെയ്തുകൊണ്ട് ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധിയും മറ്റ് 12 ‘ഇന്ത്യ’ മുന്നണി നേതാക്കളും സമര്‍പ്പിച്ച ഹര്‍ജി സുപ്രീം കോടതി ഇന്ന് പരിഗണിക്കും. ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മല്യ ബാഗ്ചി, ജസ്റ്റിസ് വി മോഹന എന്നിവരടങ്ങിയ ബെഞ്ചാണ് വിഷയം പരിഗണിക്കുന്നത്. കഴിഞ്ഞ ദിവസമാണ് ഇന്ത്യ മുന്നണി നേതാക്കള്‍ സുപ്രീംകോടതിയിലേക്ക് മാര്‍ച്ച് ചെയ്തു ഹര്‍ജി സമര്‍പ്പിച്ചത്. കമ്മീഷന്റെ നടപടികളില്‍ അടിയന്തരമായി ഇടപെടണമെന്നും വിവാദ തീരുമാനങ്ങളുമായി ബന്ധപ്പെട്ട എല്ലാ രേഖകളും പരിശോധിക്കണമെന്നുമാണ് ഹര്‍ജിയില്‍ ആവശ്യപ്പെട്ടിരിക്കുന്നത്.
ജന്തര്‍മന്തറിനെ പ്രതിഷേധ ഇടത്തില്‍ നിന്ന് ഒഴിവാക്കിയത് ചോദ്യം ചെയ്തുള്ള ഹര്‍ജികളും ബെഞ്ച് പരിഗണിക്കും. എസ് ഐ ആറുമായി ബന്ധപ്പെട്ട ഹര്‍ജികളും ഗ്യാനേഷ് കുമാറിനെതിരായ ഹര്‍ജികളും സമയബന്ധിതമായി തീര്‍പ്പാക്കണം എന്ന ആവശ്യവും ഇന്ത്യ മുന്നണി നേതാക്കള്‍ രജിസ്ട്രാറെ കണ്ട് അറിയിച്ചിരുന്നു.
ഇതിനിടെ, ഡൽഹിയിൽ ഏർപ്പെടുത്തിയ കടുത്ത ഇന്റർനെറ്റ് നിയന്ത്രണങ്ങൾക്കെതിരായ ഹർജിയിൽ കേന്ദ്ര ആഭ്യന്തര സെക്രട്ടറി സുപ്രീം കോടതിയിൽ വിശദീകരണം നൽകി. പൊതുസമാധാനം ഉറപ്പാക്കാനാണ് റെയ്‌സീന ഹിൽസിന് ചുറ്റും 4 കിലോമീറ്റർ പരിധിയിൽ താൽക്കാലികമായി ഇന്റർനെറ്റ് നിയന്ത്രണം ഏർപ്പെടുത്തിയതെന്ന് കേന്ദ്രം വ്യക്തമാക്കി.
അതേസമയം, എസ്‌ഐആറിനെതിരെ ഇന്ത്യ സഖ്യത്തിന്റെ ശക്തമായ പ്രതിഷേധ യോഗം ഇന്ന് വൈകീട്ട് നാല് മണിക്ക് ചെന്നൈ എംജിആർ നഗർ മാർക്കറ്റിന് സമീപം നടക്കും. ടിവികെയും ഈ പ്രതിഷേധത്തിൽ പങ്കാളികളാകുന്നുണ്ട്. എസ്‌ഐആർ വിരുദ്ധ പ്രതിഷേധങ്ങളിൽ ടിവികെ പങ്കെടുക്കുന്നത് ഇതാദ്യമായാണ്.
SUMMARY: Petition filed by the INDIA alliance against the SI to be heard in the Supreme Court today.
