ബെംഗളൂരു: കോക്രോച്ച് ജനതാ പാർട്ടിയുടെ (സിജെപി) നേതൃത്വത്തിൽ ബെംഗളൂരുവിൽ തിരംഗ മാർച്ച് സംഘടിപ്പിച്ചു. മാർച്ചിന് പോലീസ് ആദ്യം അനുമതി നിഷേധിച്ചെങ്കിലും നിയന്ത്രണങ്ങൾക്കും നിബന്ധനകൾക്കും വിധേയമായി പിന്നീട് അനുമതി നൽകുകയായിരുന്നു. വൈകിട്ട് 5 നും 6.30നും ഇടയിൽ മാർച്ച് നടത്താനായിരുന്നു അനുമതി. ഏതെങ്കിലും രാഷ്ട്രീയപാർട്ടിക്കോ സംഘടനയ്‌ക്കോ സമുദായത്തിനോ വ്യക്തിക്കോ എതിരേ മുദ്രാവാക്യം മുഴക്കരുതെന്നും പ്ലക്കാർഡുകളോ ബാനറുകളോ ഉയർത്തരുതെന്നും പൊതുജനത്തിന്റെ സമാധാനത്തിന് ഭംഗമുണ്ടാക്കരുതെന്നുമുള്ള വ്യവസ്ഥയിലാണ് പോലീസ് അനുമതി നൽകിയത്.
ടൗൺഹാളിനു മുന്നിൽനിന്ന് ആരംഭിച്ച് ബന്നപ്പ പാർക്കിലെ ക്വിറ്റ് ഇന്ത്യ സ്മാരകത്തിലേക്കും ഫ്രീഡം പാർക്കിലെ സ്വാതന്ത്ര്യ സ്മാരകത്തിലേക്കുമായാണ് മാർച്ച് നീങ്ങിയത്. പ്രതിഷേധ മുദ്രാവാക്യങ്ങൾ വിളിക്കുന്നതും പ്ലക്കാഡുകൾ ഉയർത്തുന്നതും പോലീസ് വിലക്കിയിരുന്നു. വാഹനങ്ങളെയും കാൽനടയാത്രക്കാരെയും തടസ്സപ്പെടുത്തരുതെന്നും നിർദേശമുണ്ടായിരുന്നു.
മാർച്ച് ആരംഭിച്ചപ്പോൾ തന്നെ പ്രവർത്തകർ രാഷ്ട്രീയ മുദ്രാവാക്യങ്ങൾ മുഴക്കിയെങ്കിലും പോലീസ് ഉടൻ ഇടപെട്ട് സമാധാനപരമായി മാർച്ച് ചെയ്യാൻ നിർദേശിച്ചു. ദേശീയ പതാക കൈകളിലേന്തി റോഡരികിലൂടെ നീങ്ങിയ പ്രവർത്തകരെ പോലീസ് വടംകെട്ടിയാണ് നിയന്ത്രിച്ചത്. മാർച്ചിൽ ‘ജാഗ്രത കർണാടക’, ‘മൈ വോട്ട്, മൈ റൈറ്റ്’ തുടങ്ങിയ വിവിധ ബഹുജന സംഘടനകളും പങ്കാളികളായി.
SUMMARY: CJP’s Tiranga Rally sees a surge of protest in Bengaluru
