കൊച്ചി: നെടുമ്പാശ്ശേരി മിനി കൂപ്പര്‍ നരഹത്യ കേസില്‍ പ്രതികളുടെ ജാമ്യ ഹരജി തള്ളി. അങ്കമാലി മജിസ്ട്രേറ്റ് കോടതിയുടേതാണ് വിധി. കേസില്‍ ഒന്നു മുതല്‍ നാലുവരെ പ്രതികളായ സുഹൈല്‍, നിനവ്, ജോയല്‍, അമീൻ എന്നിവരുടെ ജാമ്യാപേക്ഷയാണ് അങ്കമാലി കോടതി തള്ളിയത്. ഇന്നലെ ഹരജിയില്‍ വാദം പൂര്‍ത്തിയായിരുന്നു. പ്രഥമ ദൃഷ്ട്യ പ്രതികള്‍ക്ക് എതിരെ തെളിവുണ്ടെന്നും ജാമ്യം നല്‍കരുത് എന്നു പ്രോസിക്യൂഷന്‍ വാദിച്ചിരുന്നു.
എന്നാല്‍ നരഹത്യ കുറ്റം ചുമത്താന്‍ എന്ത് കുറ്റമാണ് ഉണ്ടായതെന്നും ബിഎന്‍എസ് 105 വകുപ്പ് ചുമത്തിയത് നിലനില്‍ക്കില്ല എന്നാണ് പ്രതിഭാഗം കോടതിയില്‍ വാദിച്ചത്. അപകടം സംഭവിക്കുമ്പോള്‍ സുഹൈല്‍ അനുവദനീയമായതിലും ഏകദേശം അഞ്ച് മടങ്ങോളം അളവില്‍ മദ്യം കഴിച്ചിരുന്നുവെന്ന വിവരം പുറത്തുവന്നിരുന്നു. എറണാകുളം ജില്ലയിലെ മൂന്ന് ബാറുകളില്‍ നിന്നായാണ് പ്രതികള്‍ മദ്യം കഴിച്ചത്. ഇതില്‍ നെടുമ്പാശ്ശേരി ഭാഗത്തെ ബാറില്‍ നിന്ന് മാത്രം ഇവര്‍ 4,396 രൂപയുടെ മദ്യമാണ് കഴിച്ചത്.
കഴിഞ്ഞ ഞായറാഴ്ച പുലർച്ചെ ഒന്നേമുക്കാലോടെ നെടുമ്പാശ്ശേരി എയർപോർട്ട് റോഡില്‍ വാളെപ്പുറത്താണ് അപകടമുണ്ടായത്.കൊച്ചിയില്‍ സെയില്‍സ്മാന്‍മാരായി ജോലി ചെയ്തിരുന്ന മൂന്ന് പേര്‍ (വയനാട് സ്വദേശിനി ദേവിക – 21, പാലക്കാട് സ്വദേശിനി ഗോപിക – 22, കര്‍ണാടക കൂര്‍ഗ് സ്വദേശി ഇയാസ് – 21) സഞ്ചരിച്ചിരുന്ന സ്‌കൂട്ടറിലേക്ക് അമിതവേഗതയില്‍ (120 കിലോമീറ്ററിലധികം വേഗതയില്‍) വന്ന മിനി കൂപ്പര്‍ ഇടിക്കുകയായിരുന്നു.
SUMMARY: Nedumbassery Mini Cooper accident: Bail pleas of all four accused rejected
