ബെംഗളൂരു: എംജി റോഡിനെയും കബ്ബൺ റോഡിനെയും ബന്ധിപ്പിക്കുന്ന കാമരാജ് റോഡ് ഭാഗികമായി തുറന്നു. അഞ്ച് വർഷം മുമ്പ് മെട്രോ നിർമ്മാണ പ്രവർത്തനങ്ങളുടെ ഭാഗമായാണ് റോഡ് അടച്ചത്. നേരത്തെ ഏപ്രിൽ അവസാനത്തോടെ റോഡ് പൂർണമായും തുറക്കുമെന്ന് ബിഎംആർസിഎൽ അറിയിച്ചിരുന്നെങ്കിലും, മെട്രോ നിർമാണ ജോലികൾ പൂർത്തിയാകാത്തതിനാൽ തീരുമാനം മാറ്റുകയായിരുന്നു.
കാമരാജ് റോഡിനെ എംജി റോഡിൽ നിന്ന് കബ്ബൺ റോഡിലേക്ക് മാത്രം വാഹനങ്ങൾ കടത്തിവിടുന്ന വൺവേ റോഡാക്കി മാറ്റാനാണ് ട്രാഫിക് പോലീസ് തീരുമാനിച്ചിരിക്കുന്നത്.
220 മീറ്റർ ദൂരമുള്ള കാമരാജ് റോഡ്, പിങ്ക് ലൈനിൻ്റെ (നാഗവാര മുതൽ കലേന അഗ്രഹാര വരെ) എംജി റോഡ് ഭൂഗർഭ മെട്രോ സ്റ്റേഷൻ നിർമ്മിക്കുന്നതിനായി 2019 ജൂണിലാണ് അടച്ചത്. റോഡ് അടച്ചതിനാൽ, ശിവാജിനഗറിലേക്കോ കൊമേഴ്‌സ്യൽ സ്ട്രീറ്റിലേക്കോ പോകുന്ന വാഹനങ്ങൾ അനിൽ കുംബ്ലെ സർക്കിൾ, ട്രിനിറ്റി സർക്കിൾ എന്നിവിടങ്ങളിൽ നിന്ന് തിരിഞ്ഞ് പോകാറായിരുന്നു പതിവ്. ഇത് എംജി റോഡിൽ വൻ ഗതാഗതക്കുരുക്കിന് കാരണമായിരുന്നു.
നിലവിൽ നിർമാണ ജോലികൾ തുടർച്ചയായി നടക്കുന്നുണ്ടെന്ന് ബിഎംആർസിഎൽ ചീഫ് പബ്ലിക് റിലേഷൻസ് ഓഫീസർ ബി.എൽ. യശ്വന്ത് ചവാൻ പറഞ്ഞു.
നിലവിൽ കെആർ റോഡിനും കബ്ബൺ റോഡ് ജംഗ്ഷനും കാവേരി ആർട്സ് ആൻഡ് ക്രാഫ്റ്റിനും ഇടയിൽ ഒരു വശത്ത് കൂടി ഗതാഗതം അനുവദനീയമാണെന്ന് ബെംഗളൂരു ട്രാഫിക് പോലീസ് അറിയിച്ചു.
മയോ ഹാളിൽ നിന്ന് വരുന്ന വാഹനങ്ങൾക്ക് കാവേരി ആർട്സ് ആൻഡ് ക്രാഫ്റ്റ് ജംഗ്ഷനിൽ നിന്ന് വലത്തോട്ട് തിരിഞ്ഞ് കെആർ റോഡിലേക്കും കബ്ബൺ റോഡ് ജംഗ്ഷനിലേക്കും പോകാം. മറ്റുള്ളവയ്ക്ക് ഇടത് തിരിഞ്ഞ് ബിആർവിയിലേക്കോ, കോമേഴ്‌ഷ്യൽ സ്ട്രീറ്റിലെക്കൊ പോകാവുന്നതാണ്.
TAGS: BENGALURU UPDATES| TRAFFIC POLICE
SUMMARY: Kamaraj opens partially after several years
