ബെംഗളൂരു: നിർമ്മാണത്തിലിരിക്കുന്ന മേൽപ്പാലത്തിൽ നിന്ന് ഇരുമ്പ് പൈപ്പ് തലയിൽ വീണതിനെ തുടർന്ന് ഗുരുതരമായി പരുക്കേറ്റ പോലീസ് അസിസ്റ്റൻ്റ് സബ് ഇൻസ്പെക്ടർ മരിച്ചു. ഹുബ്ബള്ളി സബർബൻ പോലീസ് സ്റ്റേഷനിൽ ജോലി ചെയ്യുന്ന നാഭിരാജ് ജെ. ദയന്നവർ ആണ് മരിച്ചത്. അടുത്ത പത്ത് മാസത്തിനുള്ളിൽ വിരമിക്കാനിരിക്കെയാണ് നാഭിരാജ് മരണപ്പെട്ടത്.
സെപ്റ്റംബർ 10നാണ് ഹുബ്ബള്ളി കോർട്ട് സർക്കിളിൽ നിർമാണത്തിലിരിക്കുന്ന മേൽപ്പാലത്തിന് സമീപം കടന്നുപോകുമ്പോൾ ഇരുമ്പ് പൈപ്പ് അദ്ദേഹത്തിന്റെ തലയിലേക്ക് വീണത്. സംഭവത്തിൽ കരാറുകാരനും എൻഎച്ച്എഐ ഉദ്യോഗസ്ഥരും ഉൾപ്പെടെ 19 പേർക്കെതിരെ സബർബൻ പൊലീസ് സ്റ്റേഷനിൽ കേസ് രജിസ്റ്റർ ചെയ്തിട്ടുണ്ട്.
നാഭിരാജിൻ്റെ മരണത്തിന് എൻഎച്ച്എഐ ഉദ്യോഗസ്ഥർ നേരിട്ട് ഉത്തരവാദികളാണെന്നും അവർക്കെതിരെ കർശന നടപടിയെടുക്കണമെന്നും ജില്ലാ ഭരണകൂടത്തോട് അദ്ദേഹത്തിന്റെ ബന്ധുവായ അഭിനന്ദൻ ആവശ്യപ്പെട്ടു. സംഭവം നടന്ന് 4-5 ദിവസം കഴിഞ്ഞിട്ടും കരാറുകാരൻ ചികിത്സയിലിരുന്ന എഎസ്ഐയെ സന്ദർശിച്ചിരുന്നില്ല. സംഭവത്തിൽ ഉത്തരവാദികളായവരെ ശിക്ഷിക്കുകയും നാഭിരാജിന് നീതി ഉറപ്പാക്കുകയും വേണമെന്നും അദ്ദേഹം ആവശ്യപ്പെട്ടു. നാഭിരാജിന്റെ കണ്ണുകൾ മറ്റൊരാൾക്ക് ദാനം ചെയ്തതായും അഭിനന്ദൻ അറിയിച്ചു.
TAGS: KARNATAKA | DEATH
SUMMARY: Police officer succumbs to injuries after iron pipe from flyover falls in him in Hubballi
