ന്യൂഡല്‍ഹി: പാർലമെൻ്റിൽ ബിജെപിക്കെതിരെ ആഞ്ഞടിച്ച് രാഹുൽ ഗാന്ധി. വലതുകൈയിൽ ഭരണഘടനയുടെ ചെറുപതിപ്പും ഇടതുകൈയിൽ മനുസ്മൃതിയും ഏന്തിയായിരുന്നു രാഹുലിന്റെ പ്രസംഗം. മനുസ്മൃതിയും ഭരണഘടനയും തമ്മിലുള്ള യുദ്ധമാണ് രാജ്യത്ത് നടക്കുന്നതെന്ന് രാഹുല്‍ പറഞ്ഞു. നമ്മുടെ ഭരണഘടനയിൽ ഇന്ത്യയുടേതായി ഒന്നുമില്ലെന്നു പറഞ്ഞ ആർ.എസ്.എസ് നേതാക്കളെ ബി.ജെ.പി തള്ളിപ്പറയുമോ എന്നും രാഹുൽ ചോദിച്ചു. മനുസ്മൃതിയാണ് ഔദ്യോഗിക രേഖയെന്നായിരുന്നു സവര്‍ക്കറുടെ വാദം. മനുസ്മൃതി ഉപയോഗിച്ച് ഭരണഘടനയെ മറികടക്കണമെന്ന് സവർക്കർ വിശ്വസിച്ചിരുന്നുവെന്ന് രാഹുൽ ഗാന്ധി പറഞ്ഞു. ഭരണഘടനയുടെ 75ാം വാർഷികത്തിന്റെ ഭാഗമായി ലോക്സഭയിൽ നടക്കുന്ന ഭരണഘടന ചർച്ചയിൽ സംസാരിക്കവെയാണ് രാഹുലിൻ്റെ പരാമർശം.
വി.ഡി സവർക്കർ, നമ്മുടെ ഭരണഘടനയിൽ ഇന്ത്യയിൽ ഒന്നുമില്ലെന്ന് അദ്ദേഹം തൻ്റെ രചനകളിൽ വ്യക്തമായി പറഞ്ഞിട്ടുണ്ട്. ഭരണഘടന സംരക്ഷിക്കുമെന്ന് നിങ്ങൾ (ബിജെപി) പറയുമ്പോൾ നിങ്ങൾ സവർക്കറെ പരിഹസിക്കുന്നു, നിങ്ങൾ സവർക്കറെ അധിക്ഷേപിക്കുന്നു, സവർക്കറെ അപകീർത്തിപ്പെടുത്തുകയാണ്- രാഹുൽ പറഞ്ഞു. രാഹുലിൻ്റെ പ്രസംഗം തടസ്സപ്പെടുത്താൻ ഭരണകക്ഷി അംഗങ്ങൾ പല തവണ ശ്രമിച്ചു. ഇതിനെതിരെ പ്രതിപക്ഷ അംഗങ്ങൾ രംഗത്തെത്തി.
ബിജെപിയെ മഹാഭാരതത്തിലെ ദ്രോണാചാര്യയുമായി രാഹുല്‍ താരതമ്യപ്പെടുത്തി, “സർക്കാർ ജോലികളിൽ ലാറ്ററൽ എൻട്രി കൊണ്ടുവരുന്നതിലൂടെ, നിങ്ങൾ യുവാക്കളുടെയും പിന്നോക്ക വിഭാഗക്കാരുടെയും പാവപ്പെട്ടവരുടെയും പെരുവിരൽ മുറിക്കുകയാണ്” ഏകലവ്യയുടെ തള്ളവിരൽ മുറിച്ചതുപോലെ, ഇന്നത്തെ യുവാക്കളുടെ അഭിലാഷങ്ങളെ പാർട്ടി ഇല്ലാതാക്കുകയാണെന്നും രാഹുൽ ഗാന്ധി കുറ്റപ്പെടുത്തി
സവര്‍ക്കറിനെ അപകീര്‍ത്തികരമായി പരാമര്‍ശിച്ചെന്ന കേസില്‍ രാഹുല്‍ ഗാന്ധിക്ക് ലഖ്‌നൗ കോടതി ഇന്ന് സമന്‍സ് അയച്ചിരുന്നു. 2022 നവംബര്‍ 17ന് ഭാരത് ജോഡോ യാത്രക്കിടെ അകോലയില്‍ സവര്‍ക്കറെക്കുറിച്ച് നടത്തിയ പരാമര്‍ശങ്ങളുടെ പേരിലാണ് കേസെടുത്തിരുന്നത്. കൊളോണിയല്‍ ഗവണ്‍മെന്റില്‍ നിന്ന് പെന്‍ഷന്‍ വാങ്ങിയ ഒരു ബ്രിട്ടീഷ് സേവകന്‍ എന്നാണ് സവര്‍ക്കറെ കുറിച്ച് രാഹുല്‍ ഗാന്ധി പറഞ്ഞത്.
<BR>
TAGS : RAHUL GANDHI
SUMMARY : There is a war going on in the country between the Constitution and Manusmriti; Rahul Gandhi attacked BJP in Lok Sabha
