ഗൃഹ ആരോഗ്യ പദ്ധതിക്ക് തുടക്കമായി

ബെംഗളൂരു : സംസ്ഥാന ആരോഗ്യ കുടുംബ ക്ഷേമ വകുപ്പ് നടപ്പാക്കുന്ന ‘ഗൃഹ ആരോഗ്യ’പദ്ധതിക്ക് തുടക്കമായി. വിധാൻ സൗധയിൽ നടന്ന ചടങ്ങിൽ മുഖ്യമന്ത്രി സിദ്ധരാമയ്യ പദ്ധതി ഉദ്ഘാടനം ചെയ്തു. ജീവിതശൈലിരോഗങ്ങളെ പ്രതിരോധിക്കുന്നത്തിനും സാംക്രമികവും അല്ലാത്തതുമായ രോഗങ്ങൾ കണ്ടെത്തുന്നതിനും ചികിത്സിക്കുന്നതിനും പാവപ്പെട്ടവർക്ക് ആരോഗ്യസംരക്ഷണം ഉറപ്പാക്കുന്നതിനും പദ്ധതി ഉപകരിക്കുമെന്ന് മുഖ്യമന്ത്രി പറഞ്ഞു. ആരോഗ്യമന്ത്രി ദിനേശ് ഗുണ്ടുറാവുവും ചടങ്ങില്‍ പങ്കെടുത്തു.

സര്‍ക്കാര്‍ ആരോഗ്യസേവനങ്ങൾ വീട്ടുപടിക്കലെത്തിക്കുന്ന ‘ഗൃഹ ആരോഗ്യ’പദ്ധതി കോലാർ ജില്ലയിലാണ് ആദ്യം നടപ്പാക്കുന്നത്. അടുത്തവർഷത്തോടെ സംസ്ഥാനത്തെ മറ്റു ജില്ലകളിലേക്കും വ്യാപിപ്പിക്കാനാണ് സർക്കാർ ലക്ഷ്യമിടുന്നത്. 30-നും അതിനുമുകളിലും പ്രായമുള്ള വ്യക്തികളെയാണ് പദ്ധതി ലക്ഷ്യമിടുന്നത്. പ്രമേഹം, രക്താതിമർദം, അർബുദം, മാനസികാരോഗ്യ അവസ്ഥകൾ എന്നിവ പദ്ധതിയുടെ പരിധിയിൽ വരും. കമ്യൂണിറ്റി ഹെൽത്ത് ഓഫീസർമാർ, പ്രൈമറി ഹെൽത്ത് കെയർ ഓഫീസർമാർ, ഹെൽത്ത് ഇൻസ്പെക്ടിങ് ഓഫീസർമാർ, ആശാ ജീവനക്കാർ എന്നിവരടങ്ങുന്ന സംഘം വീടുതോറുമെത്തി ആരോഗ്യപരിശോധന നടത്തും.
<br>
TAGS : HEALTH
SUMMARY : Gruha Arogya Project Started