കൊച്ചി: താരസംഘടനയായ അമ്മയിലെ ഭരണസമിതി തിരഞ്ഞടുപ്പ് ഓഗസ്റ്റ് 15ന് നടക്കും. പ്രസിഡന്റ് സ്ഥാനത്തു തുടരാനാകില്ലെന്നു മോഹൻലാൽ തീർത്തു പറഞ്ഞതോടെയാണ് തിരഞ്ഞടുപ്പിനു കളമൊരുങ്ങിയത്. ഹേമ റിപ്പോർട്ടിനെ തുടർന്നുള്ള ആരോപണങ്ങളെ തുടർന്ന് കഴിഞ്ഞ ഓഗസ്റ്റ് 27നാണ് മുൻ ഭരണസമിതി രാജിവച്ചത്.
കഴിഞ്ഞാഴ്ച കൊച്ചിയിൽ ചേർന്ന ജനറൽ ബോഡി യോഗം തിരഞ്ഞടുപ്പ് വേണ്ടെന്നും മോഹൻലാൽ വീണ്ടും പ്രസിഡന്റാകണമെന്നും ആവശ്യപ്പെട്ടു. എന്നാൽ ധാർമിക ഉത്തരവാദിത്വം ഏറ്റെടുത്ത് രാജിവച്ച കമ്മിറ്റിക്കു തുടരാൻ അർഹതയില്ലെന്ന് മോഹൻലാൽ വ്യക്തമാക്കി. തിരഞ്ഞടുപ്പിലേക്കു പോകുന്നതാണു ഉചിതമെന്നും സംഘടനയുടെ തലപ്പത്തേക്കു പുതിയ അംഗങ്ങളോ സ്ത്രീകളോ ചെറുപ്പക്കാരോ വരട്ടെയെന്നും അദ്ദേഹം നിലപാട് സ്വീകരിക്കുകയായിരുന്നു.
കാലാവധി കഴിഞ്ഞതോടെ അഡ്ഹോക് കമ്മിറ്റി പിരിച്ചു വിട്ടിരുന്നു. തിരഞ്ഞടുപ്പ് വരെ സംഘടനാ ചുമതല ബാബുരാജിനാണ്.
SUMMARY: AMMA executive committee elections on August 15.
