ആലപ്പുഴ: അന്തരിച്ച മുൻ മുഖ്യമന്ത്രിയും മുതിർന്ന സിപിഎം നേതാവുമായ വിഎസ് അച്യുതാനന്ദൻ്റെ സംസ്കാരത്തോട് അനുബന്ധിച്ച് ആലപ്പുഴ ജില്ലയില് നാളെ അവധി പ്രഖ്യാപിച്ചു. സർക്കാർ ഓഫീസുകള്ക്കും പ്രൊഫഷണല് കോളേജുകളടക്കം വിദ്യാഭ്യാസ സ്ഥാപനങ്ങള്ക്കും അവധി ബാധകമാണ്. വിഎസ് അച്യുതാനന്ദനോടുള്ള ആദരസൂചകമായി സംസ്ഥാനത്താകെ ഇന്ന് പൊതു അവധി പ്രഖ്യാപിച്ചിരുന്നു.
ഇതിന് പിന്നാലെയാണ് സംസ്കാരം നടക്കുന്ന ആലപ്പുഴയില് നാളെയും അവധി അനുവദിച്ചിരിക്കുന്നത്. ഇന്ന് നടത്താനിരുന്ന എംജി സർവ്വകലാശാലാ, കേരള സർവ്വകലാശാല പരീക്ഷകളും മാറ്റിവെച്ചിട്ടുണ്ട്. സംസ്ഥാനത്ത് മൂന്ന് ദിവസത്തെ ഔദ്യോഗിക ദുഃഖാചരണവും നടക്കുകയാണ്. ഈ കാലയളവില് സംസ്ഥാനമാകെ ദേശീയ പതാക പകുതി താഴ്ത്തിക്കെട്ടും.
ഇന്ന് രാത്രി 9 മണിയോടുകൂടി ആലപ്പുഴയിലെ സ്വവസതിയില് എത്തിക്കും. ബുധനാഴ്ച്ച രാവിലെ 9 മണിവരെ സ്വവസതിയിലും തുടര്ന്ന് 10 മണിയോടെ സി പി എം ജില്ലാ കമ്മിറ്റി ഓഫീസിലും പൊതുദര്ശനത്തിന് വെക്കും. ശേഷം 11 മണി മുതല് വൈകിട്ട് മൂന്ന് മണിവരെ ആലപ്പുഴ കടപ്പുറത്തെ റിക്രിയേഷന് ഗ്രൗണ്ടില് പ്രത്യേകം ഒരുക്കിയ പന്തലിലാണ് പൊതുജനങ്ങള്ക്ക് പൊതുദര്ശനത്തിന് സൗകര്യം ഒരുക്കിയിട്ടുള്ളത്. പൊതുദര്ശനത്തിന് ശേഷം നാല് മണിയോടെയാവും വലിയ ചുടുകാടില് ഔദ്യോഗിക ചടങ്ങുകളോടെയുള്ള സംസ്കാരം.
SUMMARY: Holiday for educational institutions and government offices in Alappuzha tomorrow
WhatsApp
Telegram
