ബെംഗളൂരു: ബൃഹത് ബെംഗളൂരു മഹാനഗര പാലികെ (ബിബിഎംപി) തിരഞ്ഞെടുപ്പിനുള്ള ഒരുക്കങ്ങൾ നടന്നുവരികയാണെന്ന് ബെംഗളൂരു വികസന മന്ത്രി കൂടിയായ ഉപമുഖ്യമന്ത്രി ഡി കെ ശിവകുമാർ നിയമസഭയില്‍ അറിയിച്ചു. നവംബർ ഒന്നിനകം വാർഡുകളുടെ ഡീലിമിറ്റേഷൻ പ്രക്രിയ പൂർത്തിയാകുമെന്ന് അദ്ദേഹം പറഞ്ഞു. ചോദ്യോത്തര വേളയിൽ ജെഡി (എസ്) എംഎൽസി ടിഎൻ ജവരായി ഗൗഡയുടെ ചോദ്യത്തിന് മറുപടി നൽകുകയായിരുന്നു ശിവകുമാർ. പരിധി നിര്‍ണയത്തിനായി ബിബിഎംപി കമ്മീഷണറുടെ നേതൃത്വത്തിലുള്ള സംഘത്തെ ചുമതലപ്പെടുത്തിയിട്ടുണ്ട്. ഇത് പൂർത്തിയായിക്കഴിഞ്ഞാൽ പുതിയ വാർഡ് ഘടനയെക്കുറിച്ചുള്ള ഔപചാരിക വിജ്ഞാപനം പുറപ്പെടുവിക്കും. അദ്ദേഹം പറഞ്ഞു.
ബിബിഎംപിയിലേക്കുള്ള തിരഞ്ഞെടുപ്പ് 2024 ലെ ഗ്രേറ്റർ ബെംഗളൂരു ഗവേണൻസ് ആക്ടിന്റെ മാനദണ്ഡങ്ങൾക്കനുസൃതമായി നടക്കും. ഇതിന്റെ വ്യവസ്ഥകൾ 2025 മെയ് 15 മുതൽ പ്രാബല്യത്തിൽ വന്നു. ബിബിഎംപിയുടെ അധികാരപരിധിയിലുള്ള പ്രദേശങ്ങള്‍ 2025 ജൂലൈ 19 ന് രൂപീകരിച്ച അഞ്ച് പുതിയ മുനിസിപ്പൽ കോർപ്പറേഷനുകളുള്ള ഗ്രേറ്റർ ബെംഗളൂരു അതോറിറ്റിയുടെ പരിധിയിൽ ഔദ്യോഗികമായി ചേര്‍ത്തതായും ഉപമുഖ്യമന്ത്രി പറഞ്ഞു.
SUMMARY: BBMP ward re-delineation will be completed by November 1: Deputy Chief Minister DK Shivakumar
