കൊച്ചി: യൂട്യൂബിലൂടെ അധിക്ഷേപകരമായ വാർത്തകൾ പ്രചരിപ്പിച്ച കെ എം ഷാജഹാനെതിരെ മുഖ്യമന്ത്രിക്കും ഡിജിപിക്കും മൂന്ന് എംഎല്എമാരുടെ പരാതി. കോതമംഗലം എംഎല്എ ആന്റണി ജോണ്, കൊച്ചി എംഎല്എ കെ ജെ മാക്സി, കുന്നത്തുനാട് എംഎല്എ പി വി ശ്രീനിജിന് എന്നിവരാണ് പരാതി നല്കിയത്. എറണാകുളത്തെ ഇടത് എംഎല്എമാരെ സംശയനിഴലിലാക്കുന്ന തരത്തില് വാര്ത്ത നല്കിയെന്ന് ചൂണ്ടിക്കാട്ടിയാണ് പരാതി നല്കിയത്.
വാര്ത്തയെ തുടര്ന്ന് മാനഹാനി ഉണ്ടായെന്നും പരാതിയില് പറയുന്നു. ഈ മാസം 16നാണ് ഷാജഹാന് തന്റെ യൂട്യൂബ് ചാനലില് സിപിഐഎം വനിതാ നേതാവിനേയും എറണാകുളത്തെ ഇടത് എംഎല്എമാരേയും സംശയത്തിന്റെ നിഴലില് നിര്ത്തുന്ന വിധത്തില് വിഡിയോ ചെയ്തത്. വിഡിയോ വസ്തുതാ വിരുദ്ധമാണെന്നും പരാതിയില് പറയുന്നു. സിപിഐഎം നേതാവ് കെ ജെ ഷൈന്റെ പരാതിയില് ഇന്ന് ഷാജഹാനെതിരെ പോലീസ് കേസെടുത്തിരുന്നു. ഇതിന് പിന്നാലെയാണ് എംഎല്എമാരുടെ പരാതിയും ഉയര്ന്നിരിക്കുന്നത്.
ഇതിനിടെ കെ എം ഷാജഹാനെതിരെ ബാർ കൗൺസിലിനും പരാതി. ഓൾ ഇന്ത്യ ലോയേഴ്സ് യൂണിയൻ എറണാകുളം ജില്ലാ സെക്രട്ടറി അഡ്വ എ കെ മായാകൃഷ്ണനാണ് പരാതി നൽകിയത്. ഷൈൻ ടീച്ചർക്കെതിരെ യൂട്യൂബിലൂടെ അധിക്ഷേപകരമായ വാർത്തകൾ പ്രചരിപ്പിച്ച ഷാജഹാനെതിരെ നിയമാനുസൃതമായ നടപടി സ്വീകരിക്കണമെന്നാണ് പരാതിയിലെ ആവശ്യം.അഭിഭാഷക സമൂഹത്തിനും പൊതുജനാധിപത്യ സമൂഹത്തിനും അംഗീകരിക്കാൻ കഴിയാത്ത പെരുമാറ്റമാണ് ഷാജഹാനിൽ നിന്നുണ്ടാകുന്നത്. അപകീർത്തികരവും മാനഹാനി വരുത്തുന്നതുമായ സൈബർ ബുള്ളിയിങ്ങാണ് അഭിഭാഷകൻ കൂടിയായ കെഎം ഷാജഹാൻ നടത്തുന്നത് എന്നും പരാതിയിൽ പറയുന്നു.
SUMMARY: Three MLAs file complaint with Bar Council against KM Shahjahan for spreading suspicious news
WhatsApp
Telegram
